Hugot nga ginkundenar sang Bagong Hukbong Bayan (BHB)-Camarines Norte ang pagsungka, grabe nga pagluib kag pagtraidor sa masa nanday Marlon Asis (alyas Pots) kag Julie Grace Lola (alyas Haraly). Ang duha ginpaatubang sang 42nd IB sa publiko bilang mga “surenderi” sadtong Pebrero 4 sa hedkwarters sang batalyon sa Labo, Camarines Norte.

Sa pahayag sang 42nd IB, ginsiling sini nga nagsungka ang magtiayon sang .30 kalibre kag 60 kalibre nga masinggan, mga bala, pangbomba, kag iban pa nga kagamitan pang-gyera. “Nagtraidor sila sa masang mangunguma kag sahing anakbalhas sa probinsya kabaylo sang makinaugalingon nila nga interes,” pahayag sang BHB-Camarines Norte. Magluwas sa pagsungka sang armas, nagpangalap kag nagpasa ang magtiayon sang impormasyon nga nagresulta sa sunod-sunod nga awayan nga nakahalit sa BHB kag mga sibilyan. Gindala man sang duha ang pondo sang Partido Komunista ng Pilipinas.

Nagapaandam ang BHB-Camarines Norte sa pumuluyo sang probinsya kag rehiyon nga magbantay batuk sa pagsabwag sang maitum nga propaganda kag kabutigan sang magtiayon. Gindeklarar ang duha nga “persona non grata” sa mga larangan gerilya kag sakop sang rebolusyonaryong kahublagan sa Camarines Norte.

Kampanya kontra traidor. Ginlunsar sang rebolusyonaryong kahublagan sa Southern Tagalog ang isa ka kampanya sa pagbuyagyag kag pagbatikos sa mga kontra-rebolusyonaryong traidor sining Pebrero. Nagpaguwa ang BHB kag National Democratic Front sa rehiyon sang mga poster nga may litrato sang mga traidor nga pinaka-notoryos sa pagpagamit sa Armed Forces of the Philippines kag rehimen US-Marcos. Suno sa ila, dapat kundenaron ang mga ini sa pagserbe nga instrumento sa Red-tagging kag pagpanghadlok sa pumuluyo. Nagapanawagan sila nga lapnagon nga ipalapnag sa bug-os nga rehiyon ang mga poster.