Mahugot nga ginkundenar han Bagong Hukbong Bayan (BHB)-Camarines Norte an pagsurender, pagin impormer ngan pagtraydor ha masa nira Marlon Asis (alyas Pots) ngan Julie Grace Lola (alyas Haraly). An duha gin-atubang han 42nd IB ha publiko komo mga “surenderi” hadton Pebrero 4 ha hedkwarters han batalyon ha Labo, Camarines Norte.

Ha pahayag han 42nd IB, ginsering hini nga nagsurender an mag-asawa han .30 kalibre ngan 60 kalibre nga masinggan, mga bala, eksplosibo, ngan iba pa nga higamit pan-gerra. “Nagtraydor hira ha masa nga parag-uma ngan klase nga anakbalhas ha prubinsya kabalyo han makaiya nira nga interes,” pahayag han BHB-Camarines Norte. Labot ha pagsurender han armas, nangalap ngan nagpasa pa an mag-agsawa han impormasyon nga nagresulta han susrunod nga agway nga iginkahibang han BHB ngan mga sibilyan. Nagdara liwat an duha han pondo han Partido Komunista ng Pilipinas.

Nagpahimatngon an BHB-Camarines Norte ha katawhan han prubinsya ngan rehiyon nga magbantay kontra ha pagsabrag han maitom nga propaganda ngan buwa han mag-asawa. Igindeklara an duha nga “persona non grata” ha mga prente gerilya nga lupgop han rebolusyunaryo nga kagiusan ha Camarines Norte.

Kampanya kontra traydor. Iginlansar han rebolusyunaryo nga kagiusan ha Southern Tagalog an usa nga kampanya han pagbuksas ngan pagsukna ha mga kontra-rebolusyunaryo nga traydor hini nga Pebrero. Nagpagawas an BHB ngan National Democratic Front ha rehiyon han mga poster ngan ritrato han mga traydor nga pinakalanong ha pagpapagamit ha Armed Forces of the Philippines ngan rehimen US-Marcos. Sering nira, kinahanglan kundenaron an mga nagseserbe komo instrumento ha Red-tagging ngan panhadlok ha katawhan. Nanawagan hira nga hiluagan nga ipasamwak ha bug-os nga rehiyon an mga poster.