Bunga han waray hunong nga pakigbisog han katawhan han Dupax del Norte, Nueva Vizcaya kontra ha panginginlabot han Woggle Corporation ha ira komunidad, napiritan an Mines and Geosciences Bureau nga iginmando hadton Pebrero an temporaryo nga suspension han permit ha eksplorasyon han kompaniya. Ginsering nga hinungdan hini an “force majeure” o panhitabo nga waray ha kontrol han nakatin han permit. Kalakip hini nga mga panhitabo an pagtitindog han barikada, mahugot nga pagtipa ngan naeksister nga tensyon giutan han mga residente ngan kompaniya.

Ha luyo han mando, iginpapadayon pa gihap han kompaniya an eksplorasyon. Hadton Pebrero 17, ha bulig han PNP, igin-gawas han kompaniya an mga makina hini ngan igindul-ong ha DENR an mga mineral sample nga nakuha tikang ha baryo.

Hadton Pebrero 12, nagprotesta an gatus-gatos nga residente, grupo nga pankalibungan, tawo ha singbahan ngan mga nasuporta ha pakigbisog han mga taga-Dupax. Iginhimo an paggios ha kapitolyo han Nueva Vizcaya agud ipanawagan an dagmit nga kanselasyon ha permit ha eksplorasyon han kompaniya.

Iginlansar an paggios kadungan han pagbista han pito nga tagdepensa han kalibungan nga gin-aresto kahuman han madarahug nga pagbungkag ha barikada hadton Enero 23. Ha pagbista, komo makatawo nga konsiderasyon, ginbawi han RTC branch 30 an mando hini nga ginpapaliwanag an pito nga residente han Dupax del Norte kay ano diri hira angay salawdan han kaso nga direct contempt (pagtalapas ha mando han korte).

Hadton Pebrero 16 igintukod ha UP Diliman an Defend Nueva Viscaya Movement. Tinambong dinhi an mga lider ha komunidad han Dupax del Norte, grupo nga pankalibungan, mga minoriya, tawo ha singbahan, akademiko nga institusyon, ngan mga indibidwal para depensahan an kalibungan, natural nga karikuhan ngan katungod han katawhan ha Nueva Vizcaya.