Sunod-sunod nga protesta ug aktibidad ang gilunsad sa mga mamumuo ug ilang mga unyon sa Quezon City, Cavite ug Laguna aron iduso ang pagrespeto sa ilang collective bargaining agreement (CBA) ug uban pang mga katungod sa pamuo.

Sa Quezon City, nagsumite ang Glowhrain-KMU-Kowloon House West Chapter Union og Notice of Strike niadtong Marso 6 sa Department of Labor and Employment (DOLE) aron ipanghingusog ang ilang CBA ug kundenahon ang mga kaso sa pagpanghasi batok sa ilang unyon. Nagprotesta usab sila sa Kowloon House West sa West Avenue, Quezon City sa maong adlaw.

Sumala nila, dili madawat ang tanyag sa nanag-iya sa restawran nga Katiunan Food Services Inc. (KFSI) nga ₱10 matag adlaw nga dugang suhol. Sa una, nangayo ang unyon og ₱50 nga dugang sa adlawang suhol pero nakompromiso kini ug gipaubos ang pangayo ngadto sa ₱35 matag adlaw. Gikundena usab sa mga mamumuo ang wala pagsunod sa kumpanya sa gisabutan nga dugang suhol sa miaging mga CBA nga gibanabanang mokabat na sa ₱5.5 milyon sa tulo ka tuig.

Isip tubag, nag-anunsyo ang KFSI niadtong Marso 14 nga dili na kini ang tag-iya sa restawran. Gitangtang na usab niini ang karatula nga “Kowloon House” sa ibabaw sa restawran ug gipulihan og ngalan sa laing negosyo. Gikahadlokan sa unyon nga gibaligya na o gibalhin na ang pagpanag-iya sa restawran aron ikyasan ang mga obligasyon niini sa mga mamumuo.

Sa Laguna, sunod-sunod nga protesta ang gilunsad sa mga mamumuo sa PhilFoods Fresh Baked Products Inc, Gardenia Philippines ug Daiwa Seiko Philippines niadtong Marso 7, 9 ug 12. Nagmartsa sila sulod sa Laguna International Industrial Park sa Barangay Mampalasan, Biñan. Gikundena nila ang gipasang-at sa kapitalistang PhilFoods niadtong Marso 4 nga kasong “insubordination” batok sa mga unyonista. Kini nga kaso naay kalabotan sa protesta sa unyon para iduso nga ipatuman sa kumpanya ang mga probisyon sa CBA bahin sa sweldo.

Samtang, nakabalik na sa trabaho niadtong Marso 9 ang duha ka lider-unyonista sa Nexperia Philippines Inc. Workers Union nga gitangtang niadtong 2024. Kining duha ka lider bahin sa upat ka lider sa unyon nga dungan-dungan nga gitantang niadtong Disyembre 17, 2024 isip balus sa unyon. Kini ang nag-aghat kanila nga magwelga niadtong Marso 2025.

Sa Cavite, nagkampanya ang Samahan sa mga Mamumuo sa EMI-Independent sa mga mamumuo nga mopirma alang sa Petition for Certification Election. Kini nga petisyon pormal nga nihangyo sa DOLE nga magpahigayon og eleksyon para sa pagpili og unyon nga magarepresentar sa mga mamumuo alang sa CBA.

Kasamtangang naa sa “freedom period” ang mga mamumuo ug kumpanya diin adunay 60 ka adlaw nga gitakda aron hagiton o ilisan ang ilang representanteng unyon sa negosasyon alang sa CBA. Niadtong Pebrero 19, ikaduhang adlaw sa “freedom period,” nakasinati na dayon og pagpanghasi ang unyon bahin sa pagpangolekta nila og pirma alang sa petisyon.