Sunod-sunod nga protesta kag pagtililipon ang ginlunsar sang mga mamumugon kag ila unyon sa Quezon City, Cavite kag Laguna para igiit nga respetuhon ang ila collective bargaining agreement (CBA) kag iban pa nga kinamatarung sa pamugon.

Sa Quezon City, nagsumiter ang Glowhrain-KMU-Kowloon House West Chapter Union sang Notice of Strike sadtong Marso 6 sa Deparment of Labor and Employment (DOLE) agud ipakigbato ang CBA kag batikuson ang mga kaso sang pagpang-ipit sa ila unyon. Nagprotesta man sila sa Kowloon House West sa West Avenue, Quezon City sa adlaw nga ini.

Siling nila, indi mabaton ang tanyag nga ₱10/adlaw nga dugang-sweldo sang pamunuan sang restawrant nga Katipunan Food Services Inc. (KFSI). Una nga nagpangayo ang unyon sang dugang nga ₱50/adlaw apang nakigkompromiso ini kag ginpanubo padulong sa ₱35/adlaw. Ginareklmao man sang mga mamumugon ang indi pagsunod sang kumpaniya sa mga nakasugtan nga dugang-sweldo sa mga nagligad nga CBA nga ginabana-bana nga nagalab-ot sa ₱5.5 milyon sa tatlo ka tuig.

Bilang sabat diri, nag-anunsyo ang KFSI sadtong Marso 14 nga wala na sini ginapanag-iyahan ang restawrant. Ginkakas naman ang karatula nga “Kowloon House” nga nagasab-it sa ibabaw sang restawrant kag gin-ilisan sang ngalan sang iban nga negosyo. Nagabalaka ang unyon nga ginbaligya ukon ginbuslan na ang tag-iya sang restawrant.

Sa Laguna, sunod-sunod nga protesta ang ginlunsar sang mga mamumugon sang PhilFoods Fresh Baked Products Inc, Gardenia Philippines kag Daiwa Seiko Philippines sadtong Marso 7, 9 kag 12. Nagmartsa sila sa sulod sang engklabo nga Laguna International Industrial Park sa Barangay Mamplasan, Biñan. Ginkundenar nila ang ginpasaka sang kapitalistang PhilFoods sadtong Marso 4 nga kaso nga “insubordination” sa mga unyonista. Ang kaso kaangot sa protesta sang unyon nga tumanon sang kumpaniya ang mga probisyon sang CBA kaangot sa pasweldo. Samtang, napabalik sa trabaho sadtong Marso 9 ang duha ka lider-unyonista sang Nexperia Philippines Inc. Workers Union (NPIWU-NAFLU-KMU) nga ginkakas sadtong 2024. Ang duha kalakip sa apat ka mga lider sang unyon nga dungan nga ginpangkakas sadtong Disyembre 17, 2024 bilang balos sa unyon. Ini ang nagduso sa ila nga magwelga sadtong Marso 2025.

Sa Cavite, nagakampanya ang Samahan ng mga Manggagawa sa EMI-Independent sa mga mamumugon nga magpirma para sa Petition for Certification Election. Ang amo nga petisyon sa DOLE nagapangayo sang eleksyon para magpili sang unyon nga magatiglawas sa mga mamumugon para sa negosasyon sa CBA.

Sa subong, yara sa “freedom period” ang mga mamumugon kag kumpaniya kon diin may 60 ka adlaw nga natalana para hangkaton ukon ilisan ang ila tiglawas nga unyon sa negosasyon para sa CBA. Sadtong Pebrero 19, nag-agum sang pagpang-ipit ang unyon kaangot sa pagpangalap sang pirma para sa petisyon.