Gyera ang indi malikawan nga dangatan sang imperyalismo. Ang pag-analisa nga ini ni Vladimir Lenin tuman ka athag subong nga ginapamatud-an nga husto sa mga gyerang agresyon sang imperyalismong US sa idalum sang buang nga pasista nga si Donald Trump. Sa handum nga angkunon ang mga kuluhaan sang lana kag mineral, wala patugsiling nga ginagamit subong sang US ang bug-os nga pwersa militar sa mga gyerang agresyon agud tapakan ang sobereniya sang mga pungsod nga nagamakinaugalingon, nga wala sang ginarespeto nga internasyunal nga pagsulundan ukon layi sa gyera.

Kahimbon ang Zionistang estado sang Israel, tatlo ka semana na nga patarasak nga ginabomba sang US ang Iran, nga nag-utas sang kabuhi sang masobra na 1,000 ka Iranian. Kadungan sini, masobra 1,000 na ang ginpatay sang Zionistang Israel sa pagpangbomba kag paglusob sa katambi nga pungsod nga Lebanon batuk sa grupong Hezbollah. Sa sulod lang sang duha ka bulan, ginsalakay sang US ang Venezuela, gin-ipit ang pungsod Cuba, kag ginpahog ang Colombia, Mexico, Greenland kag iban pa nga pungsod.

Dehado man, pursigido ang pagdepensa sang Iran sa iya independensya. Taliw-as sa gusto ni Trump nga magsulsol sang pag-alsa batuk sa gobyernong anti-US, minilyon ka pumuluyo ang nagbubo sa kadalanan para batikuson ang pagpangsalakay sang US. Yara sa Iran ang bug-os nga kinamatarung nga magdepensa batuk sa dumuluong nga agresyon. Ang pagpang-ipit sini sang alagyan sang lana sa Hormuz Strait kag mga bira sa mga katambi nga pungsod nga may base militar sang US mga ipit-ipit nga tikang agud punggan ang brutal nga pagpanalasa sang imperyalismong US.

Resulta sang pagpang-gyera sang US sa Middle East, ang mga pungsod sa lain-lain nga bahin sang kalibutan yara sa bibi subong sang istagplasyon—sang wala sang tupong ka dasig nga pagsaka sang presyo sang mga balaklon, sa tunga sang istagnasyon ukon resesyon dulot sang pagbagsak sang produksyon, kag malaparan nga disempleyo. Nagaatubang subong ang Pilipinas sa peligro sang grabe nga krisis sa ekonomiya kag madalum nga pagbulusok sang palangabuhian. Yara subong sa katalagman nga maipit ang suplay sang lana sa pungsod. Doble ang laslas sa pungsod sa pagsaka sang presyo sang lana tungod sa sobra nga ginapatong sa presyo sang mga sakon sa ganansya nga mga kumpaniya.

Tungod sa nagadako nga balor sang produksyon kag transportasyon, madasig nga nagbutyog kag magabutyog pa ang presyo sang halos tanan nga balaklon, lakip ang bugas (nga yara na sa ₱60 kada kilo), karne, isda kag utanon, kag sukot sa mga serbisyo. Naglab-ot pa ang tayuyon nga pagbulusok sang balor sang piso kontra dolyar nga mas pa nga magapasaka sa bili sang mga imported nga baligya (lakip ang lana). Ginhatagan ligwa ni Marcos ang pagpasaka sang pamasahe sa eroplano kag byahe sa barko, pero nagapabungol-bungol naman ini sa ginapangayo nga saka sa pamasahe sang mga drayber kag opereytor sang dyip kag magagmay nga transportasyon, nga madamo maga-untat na sa pagpasada tungod sa pagkapierde.

Labi nga nagsarurot ang lebel sang pangabuhi sang pumuluyong Pilipino nga nagaantus sa manubo nga sweldo, tuman ka kulang nga kita ukon kawad-on sang palangabuhian. Grabe nga igo sa mga mamumugon ang pagpamalibad nga ihatag ang ginapangayo nga makabuhi nga sweldo. Yara sa peligro nga mag-untat ang operasyon sang mga pabrika kag paglala sang disempleyo. Kayod-karabaw ang masang anakbalhas para lang makakita sang makabuhi sa ila mga pamilya.

Bungol sa mga reklamo sang pumuluyo kag paantus ang burukrata-kapitalista nga rehimen Marcos. Kakunsabo si Marcos sang mga sakon nga kumpaniya sa lana sa pagpasaka sang presyo, nga katumbas amo ang dugang nga ginakolekta nga buwis. Wala pulos ang kutimoy nga subsidyo kag ayuda kag limitado nga “libre-sakay.” Dugang nga paantus ang “4-day workweek,” ilabi na sa nagasweldo sang inadlaw. Tuman ka inutil ang gobyernong Marcos sa pagproteksyon sang kaayuhan sang minilyon nga migranteng Pilipino sa Middle East. “Magkinot” ang panawagan sa pumuluyo nga indi na makaginhawa sa kahugot sang paha, samtang nagapanami sa pangabuhi si Marcos sa ginateneran nga P1-milyon kada gab-i nga hotel sa New York. Binilyon ka piso nga pondo sang banwa ang ginwaldas sang Armed Forces of the Philippines (AFP) kag militar sang US sa ginapatigayon nga Balikatan exercises nga magadugay sang pila ka bulan. Tuman ka bug-at nga paantus sa banwa ang korapsyon kag pagpangkurakot ni Marcos sa kaban sang banwa. Nagasingki ang bangaaan sang mga nagahari nga paksyon Marcos kag Duterte nga lunsay korap kag sunod-sunuran sa interes sang mga imperyalistang dumuluong. Wala-puas ang pasistang pagpangsumpo sa atubang sang nagabaskog nga pakigbato sang pumuluyo.

Sa atubang sang gyera kag krisis, dapat maghiliusa ang pumuluyong Pilipino kag ululupod nga ipakig-away ang ila kaayuhan. Pabaskugon ang pangkalibutanon nga solidaridad sa pagsinggit nga tapuson ang gyerang agresyon sang US sa Iran, kag pagsuporta sa pumuluyo sang Iran para depensahan ang ila pungsodnon nga independensya. Punggan ang paggamit sa Pilipinas nga lunsaran sang mga gyerang agresyon sang US, palayason ang mga base kag pasilidad militar sa idalum sang EDCA, kag ibasura ang mga indi patas nga kasugtanan nga nagahigot sa Pilipinas sa interes sang US kag nagaganoy diri sa mga imperyalistang gyera. Dapat kadungan nga ipakigbato ang gilayon nga pagrolbak sa presyo sang lana, pagpabasura sa Oil Deregulation Law, gilayon nga pagpasaka sa sweldo sang mga mamumugon kag sweldo sang mga empleyado, kag pagkakas sang VAT kag iban pa nga buwis agud gilayon nga panubuon ang presyo sang mga balaklon. Ang ginapangayo nga dugang nga pamasahe sang mga drayber kag opereytor sang dyip makatarungan kag dapat ipakigbato.

Isulong ang paghimakas para sa matuod nga pungsodnon nga kahilwayan, agud makabuhi sa armadong kontrol kag dominasyon sang imperyalismong US sa ekonomiya kag pulitika sang pungsod. Gamit sang imperyalismong US ang papet nga rehimen Marcos kag mersenaryong AFP para ipabilin ang mala-kolonyal nga paghari sini sa Pilipinas. Armadong pwersa ang kinahanglan sang pumuluyong Pilipino para pukanon ang papet nga estado kag hilwayon ang pungsod sa armadong kagamo nga dala sang imperyalistang agila.

Ini ang makasaysayan nga katungdanan sang Bagong Hukbong Bayan sa pagpamuno sang Partido, kaupod ang bug-os nga pumuluyo. Sa tunga sang imperyalistang gyera, tuman ka dalum sang importansya sang pagsaulog sang nagahilapit nga ika-57 nga anibersaryo sang BHB para liwat palig-unon ang desisyon nga isulong ang demokratikong rebolusyon sang banwa paagi sa pangmalawigon nga inaway banwa, nga ang dala sa pumuluyo amo ang paglaum nga tapuson ang paghari sang imperyalismong US sa pungsod kag agumon ang masanag nga buasdamlag. Bisan subong magamay kag mahuyang pa ang BHB, determinado ini nga magpalapad kag magpabaskog sa kaumhan, nga maathag nga nagatulok sa pagsilak sang Pula nga adlaw sa sidlangan sang palaabuton.