Ang gera dili malikayan nga katapusan sa imperyalismo. Kining pagtuki ni Vladimir Lenin klarong gipamatud-an karon nga sakto sa mga gerang agresyon sa imperyalismong US ubos sa buang nga pasistang si Donald Trump. Sa pagdahum nga maangkon ang mga tinubdan sa lana ug mineral, walay puas nga gigamit karon sa US ang tibuok kusog militar sa mga gerang agresyon aron yatakan ang soberanya sa mga nasud nga nakaugalingon, nga pagtamas-tamas sa internasyunal nga mga lagda o balaod sa gera.

Kakunsabo ang Zionistang estado sa Israel, tulo ka semana na ang walay puas nga pagpamomba sa US sa Iran nga mipatay sa kapin 1,000 ka Iranian. Dungan niini, kapin 1,000 na ang gipatay sa Zionistang Israel pinaagi sa pagpamomba ug pagpangatake sa silingang nasud nga Lebanon batok sa grupo nga Hezbollah. Sulod lamang sa duha ka bulan, gisulong sa US ang Venezuela, gipig-ot ang nasud nga Cuba, ug gihulga ang Colombia, Mexico, Greenland ug uban pang nasud.

Bisan dehado, kusganong gipanalipdan sa Iran ang iyang soberanya. Sukwahi sa gusto ni Trump nga moaghat og rebelyon batok sa anti-US nga gobyerno, minilyong katawhan ang nihaguros sa kadalanan aron kundenahon ang pagpangatake sa US. Hingpit ang katungod sa Iran nga magdepensa batok sa langyaw nga agresyon. Ang pagkontrol niini sa agianan sa lana sa Hormuz Strait ug pagpunting sa mga silingang nasud nga adunay base militar sa US dinaliang mga lakang aron pugngan ang brutal nga atake sa imperyalismong US.

Tungod sa pagpanggera sa US sa Middle East, ang mga nasud sa lain-laing bahin sa kalibutan anaa karon sa ngilit sa istagplasyon—sa walay ikatanding kapaspason sa pagtaas sa presyo sa mga palaliton, taliwala sa istagnasyon o resesyon tungod sa pagkunhod sa produksyon, ug kaylap nga kawalay trabaho. Nag-atubang karon ang Pilipinas sa hulga sa grabe nga krisis sa ekonomya ug paspas nga pag-us-us sa panginabuhi. Gikahadlokan nga maipit ang suplay sa lana sa nasud. Doble ang hampak sa katawhan sa pagtaas sa presyo sa lana tungod sa sobra nga patong sa presyo sa mga hakog-sa-kita nga kumpanya.

Tungod sa pagdako sa gasto sa produksyon ug transportasyon, paspas nga misirit ug mosirit pa ang presyo sa halos tanan nga mga palaliton, lakip ang bugas (nga mikabat na sa ₱60 kada kilo), karne, isda ug utanon, ug singil sa mga serbisyo. Mipatong pa ang padayon nga pag-us-us sa balor sa piso batok sa dolyar nga labi pang nagpadako sa gasto sa mga imported nga palaliton (lakip ang lana). Gitugotan ni Marcos ang dugang sa plete sa eroplano ug barko, pero bungol siya sa hangyo nga dugangan ang plete sa mga drayber ug opereytor sa dyip ug gagmayng transportasyon, nga daghan na ang wala mibyahe tungod kay alkansi na kaayo sila.

Dugang pang mihagsa ang lebel sa pamuyo sa katawhang Pilipino nga nag-antos sa ubos nga suhol, kulang-kaayong kita o kawalay panginabuhi. Grabe nga hampak sa mga mamumuo ang pagdumili sa rehimen nga ihatag ang gihangyo nga makabuhi nga suhol. Naay peligro nga moundang ang operasyon sa mga pabrika ug modaghan ang walay trabaho. Nanarbaho sama sa kabaw ang masang anak sa buhat para lang makakita og panginabuhian ang ilang mga pamilya.

Bungol sa mga hangyo sa katawhan ug sa ilang pag-antos ang burukrata-kapitalistang rehimeng Marcos. Kakunsabo si Marcos sa mga hakog nga kumpanya sa lana sa pagpasaka sa presyo, nga tumbas sa dugang nga buhis nga gikolekta. Walay pulos ang gamay nga subsidyo ug ayuda ug limitado nga “libre nga sakay.” Dugang paantus ang “4-day workweek,” labi na sa mga adlawan ang sweldo. Walay pulus ang gobyernong Marcos sa pag-atiman sa kapalaran sa minilyong migranteng Pilipino sa Middle East. “Magtipig” ang awhag niini sa katawhang dili na makaginhawa sa kapig-ot, samtang hayahay kaayo si Marcos sa ₱1-milyon kada gabii nga hotel sa New York. Binilyong pisong pondo sa nasud ang giusik-usik sa Armed Forces of the Philippines (AFP) ug militar sa US sa igalunsad nga Balikatan exercises nga molungtad og pipila ka buwan. Grabe kaayong paantus sa nasud ang korapsyon ug pagpangawat ni Marcos sa pondo sa katawhan. Mograbe pa ang away sa mga nagharing paksyong Marcos ug Duterte nga parehong korap ug masinugtanon sa interes sa mga imperyalistang langyaw. Walay hunong ang pasistang pagpanumpo taliwala sa nagakusog nga pakigbisog sa katawhan.

Atubangan sa gera ug krisis, kinahanglan maghiusa ang katawhang Pilipino ug dungan-dungang ipakigbisog ang ilang kaayohan. Palig-onon ang kalibutanhong pakighiusa sa pagsinggit aron tapuson ang gerang agresyon sa US sa Iran, ug pagsuporta sa katawhan sa Iran aron ipanghingusog ang ilang nasudnong soberanya. Supakon ang paggamit sa Pilipinas isip lunsaran sa mga gerang agresyon sa US, palayason ang mga base ug pasilidad militar ubos sa EDCA, ug ibasura ang mga dili patas nga kasabutan nga nagbugkos sa Pilipinas sa interes sa US ug nagguyod niini sa mga imperyalistang gera. Kinahanglan usab ipakigbisog ang dinaliang pag-rolbak sa presyo sa lana, pagbasura sa Oil Deregulation Law, dugang sa sweldo sa mga mamumuo ug kawani, ug pagtangtang sa VAT ug uban pang buhis aron dihadihang mapakunhod dayon ang presyo sa mga palaliton. Makatarunganon ug kinahanglan ipakigbisog ang hangyo nga dugang plete sa mga drayber ug opereytor sa dyip.

Iasdang ang pakigbisog alang sa tinuod nga nasudnong kagawasan, aron maluwas ang nasud sa armadong kontrol ug dominasyon sa ekonomiya ug politika sa imperyalismong US. Gigamit sa imperyalismong US ang papet nga rehimeng Marcos ug mersenaryong AFP aron ipatunhay ang malakolonyal nga paghari niini sa Pilipinas. Armadong kusog ang gikinahanglan sa katawhang Pilipino aron ibagsak ang papet nga estado ug ilingkwas ang nasud gikan sa armadong paghari sa imperyalistang agila.

Kini ang makasaysayanong tahas sa Bagong Hukbong Bayan ubos sa pagpangulo sa Partido, kauban ang tibuok katawhan. Taliwala sa imperyalistang gera, bug-at ang kahulugan sa pagsaulog sa umalabot nga ika-57 nga anibersaryo sa BHB para subling palig-onon ang kabubut-ong iasdang ang demokratikong rebolusyon sa katawhan pinaagi sa malungtarong gubat sa katawhan, nga naghatag sa katawhan og paglaum nga tapuson ang paghari sa imperyalismong US sa nasud ug makab-ot ang lamdag nga kaugmaon. Bisan karong gamay ug huyang pa ang BHB, determinado kini nga magpalapad ug magpalig-on sa kabanikanhan, nga adunay klarong paglantaw sa pagsubang sa Pulang adlaw sa sidlakan sa umalabot.