Maulanon kag gab-i apang pursigido nga magkadto ang grupo sang kababaehan nga tumandok sa ginakampuhan sang isa ka yunit sang Bagong Hukbong Bayan sa Barangay Berta sa isa ka larangan sa Southern Tagalog. Mainit nila nga ginbaton ang imbitasyon para sa pagtukod sang Makabayang Kilusan ng Bagong Kababaihan (Makibaka), ang rebolusyonaryong organisasyon sang kababaehan para sa armadong paghimakas. Gintuon ang pagtipon sa pagdumdom sa Pangkalibutanon nga Adlaw sang Kababaehan nga Anakbalhas.

Una nga gintalakay sa pulong ang seguridad, sunod ang malip-ot nga pagpaathag sa katuyuan sa pagtukod sang rebolusyonaryong organisasyon kag pagpakilala sang mga tumalambong kag magabulig. Ginpaathag sa mga tumalambong ang importansya sang paghiliusa kag mga disbentaha sang paiya-iya. Tanan sila nagkumpormi nga tukuron ang grupo kag gilayon nga nagtalana sang ila mga lider. Gin-athag sa mga lider kag katapuan ang ila mga katungdanan kag responsibilidad.

“Engganyuhon namon ang kababaehan nga wala nakatambong subong nga mag-upod sa amon grupo,” panegurado ni Ka Edna, isa sa napili nga lider. Tungod madulom na, sa sunod nga adlaw na lang gin-iskedyul ang pormal nga pagtuon.

Sa adlaw man nga ini, una nga gintukod ang grupo sang mga tumandok. Ginpatigayon ini pagkatapos sang pagtuon sang Malip-ot nga Kurso sang Katilingban kag Rebolusyon Pilipino. Ang pagtuon ginpasanto sang instruktor sa lebel sang literasiya kag numeransya sang mga tumalambong kag ginhimo nga makagalanyat paagi sa pag-drowing sang mapa kag pagpasanto sang mga halimbawa. May pila man ka bidyo nga ginpaguwa antes kag pagkatapos sang pagtuon.

Nangin mapagsik ang talakayan kag aktibo nga nagpaambit sang ila mga eksperyensiya kag ihibalo ang mga estudyante. “Matuod gid nga makaluluoy ang mga tumandok kon magsulod ang mga dumuluong nga mina diri, segurado nga mapalayas kami kag madula ang amon palangabuhian,” siling ni Ka Elmer, isa sa lider sang grupo, sa kon paano nakaapekto sa ila ang imperyalismo.

Kahibalo sila sang peligro sang mga dumuluong nga mina sa kapalibutan. Nahangpan nila nga tungod sa monopolyo kag konsentrasyon sang pipila ka gamhanan nga pamilya sa duta amo nga wala sila sang kaugalingon nga duta nga ginabungkal. Naga-agsa lang sila sa magagmay nga agalon mayduta sa tungaay nga 60-40. Ginalukdo nila ang tanan nga galastuhan sa kalubihan apang tungod wala sila sang pangpinansya nagapangutang sila sa ila amo. Tuman ka kulang ang ila ginakita gani lubong sila sa utang. Wala man sila ginabuligan sang korap nga reaksyonaryong gobyerno agud makatibawas sa kabudlayan nga ila ginaagum.

“Kinahanglan ko pa nga iprenda ang akon karabaw sa komersyante agud may pangbayad sa pagpa-ospital sang akon apo nga naaksidente. Tuman ka mahal sang bulong! Ang ginakita ko sa pag-kopra nga ginbakal sang tuman ka barato, kulang pa nga pangbayad sa utang,” masubo nga estorya ni Ka Sanny, pinakatigulang sa grupo. Mabatian sa iya tingog ang pagkadismayado sa reaksyonaryong gobyerno nga ginapadalagan sang mga korap kag kawatan. Kahibalo siya sang pagka-inutil sini sa pagpaseguro sang ila kinamatarung sa ikaayong-lawas.

Samtang ginatukod ang organisasyon, ginapaseguro sang masa ang seguridad sang baryo. Nagpatigayon sila sang pagrekon kag gilayon nga nagareport sa yunit sang mga matalupangdan sa palibot.

Pila man ka tuig nga wala nabalikan sang hukbo sang banwa ang lugar. Madugay nga nakalubog diri ang mga soldado gani nangin mahinalungon ang yunit sa pagpalapit kag pagkilatis sa sadto naorganisa nga nagasuporta pa sa rebolusyonaryong kahublagan.

“Sa pagsulod sa rekoberi erya, una nga higayon ini nga nakatukod sang duha ka grupo sa sulod lang sang isa ka adlaw,” suno kay Ka Yanny, isa ka tim lider.

Natapos ang mga pagtipon nga may kapagsik kag kalipay sa mga masa kag sa mga pamatan-on nga nagpangabuhi sa kaumhan upod sa mga Pulang hangaway. “Madamo ako sang natun-an sa pagtukod sang grupo, sa kon paano magpasanto sa tagpalamati, halin sa lenggwahe tubtob sa paghatag sang halimbawa sa mga topikong teoritikal nga mahapos nila mahangpan kag base man sa ila inagihan,” siling ni Ka Mars, myembro sang Kabataang Makabayan.

“Sa pila ka adlaw ko pa lang diri sa Pulang hukbo, madamo na ako sang natun-an kag nadugangan ang akon eksperyensya,” pagpaambit ni Ka Paolo. Lakip sanday Ka Paolo kag Ka Mars sa mga pamatan-on halin sa syudad nga nagsabat sa panawagan sang Partido Komunista ng Pilipinas nga magkadto sa kaumhan, magtuon kag mag-amot sa armadong paghimakas.