Ginpatuman sang Bagong Hukbong Bayan (BHB)-South Central Negros (Romeo Nanta Command) ang sangsyon sang demokratikong gobyerno sang banwa sa W.D Anglo Agri Farm, isa ka abusado nga kumpaniya sa agrikultura sa Negros Occidental sadtong Marso 8. Ginapanag-iyahan ini ni Wilfred D. Anglo kag nahamtang sa Hacienda Baling, Barangay Libacao, Himamaylan City. Ginparalisa kag ginsunog sang BHB ang tatlo ka traktora, isa ka crane kag isa ka backhoe sang kumpaniya nga ginabana-bana nagabalor sang ₱30-₱40 milyon.

Ang mga obreros sang kumpaniya napaidalum sa sistemang pakyaw. Nagalab-ot lang sa ₱2,400 kada ektarya ang bayad para sa hilamon (weeding), ₱930 kada laksa (katumbas sang 10,000 tangkay sang tubo) ang patdan ukon pagtanum, ₱220 kada tonelada sa pagtapas, kag ₱3 sa kamada (stacking). Malayo nga manubo ini sa minimum nga inadlaw nga sweldo sa Negros Occidental (₱520) kag Negros Oriental (₱500) sa mga mamumugon sa agrikultura, nga napuno sang pyudal nga kademonyohan nga labi nga nagalubong sa mga mamumugon sa kampo sa kabuhi sang sistematikong kagutuman.

Ginalubong man ni Anglo sa sampaw-sampaw nga utang ang mga mamumugon sa kampo sa pagpatuman sang 10% semanal nga interes sa kwarta nga ginautang nila.