Demolisyon sa Marikina, ginapakigbatuan. Liwat gintukod sang mga residente sang Agora Compound sa Barangay Sto. Niño, Marikina City ang ila kampuhan sadtong Marso 14 agud punggan ang demolisyon sa ila komunidad. Liwat sila nga nagpanawagan para sa in-city relocation. Indi magnubo sa 145 ka pamilya ang pagapalayason sang demolisyon.

Away sa pribatisasyon sang merkado sa Cebu, nagalapad. Sunod-sunod nga protesta ang ginpatigayon sang mga grupo, mga manugbaligya kag residente sa Carbon Market, Barangay Ermita sa Cebu City sadtong Marso 14-17 para ipabasura ang pribatisasyon sang merkado. Ginabana-bana nga 16,000 ka manugbaligya kag trabahador ang mawad-an sang pwesto kag trabaho sa merkado, kag maupod ang 700 ka balay sa katambi nga Sityo Bato sa pribatisasyon.

Rekrutment sang AFP sa Ateneo, napunggan. Napaatras sang mga estudyante sang Ateneo de Manila University ang partisipasyon sang Armed Forces of the Philippines (AFP) sa Ateneo Career Fair sadtong Marso 13 tungod sa pagbatikos diri kag rekord sini sa paglapas sa tawhanon nga kinamatarung. Sa adlaw sang career fair, nagrali ang mga estudyante kag ginkakas ang karatula nga “AFP Recruitment Booth.”

Gilayon nga pagpapauli sa mga migrante, ginapanawagan. Nagprotesta ang mga grupo sang Migrante sa Mendiola sa Manila sadtong Marso 17 agud ipanawagan ang luwas nga pagpapauli sa mga migranteng Pilipino nga naipit sa gyera sa Middle East. Kadungan sini ang pagdumdom sa ika-31 nga anibersaryo sa pagbitay kay Flor Contemplacion sadtong 1995.

.