Iti sango ti nakaro a krisis ken panagbisin, immawag ti Pambansang Katipunan ng mga Mabubukid (PKM) iti masa a mannalon nga agkaykaysa ken sangsangkamaysa nga agtignay tapno ilaban ti karbengan ken pagimbagan da.

Segun iti PKM, tapno direkta a marisut ti didigra ket rumbeng a pangiggeman ti kina-organisado ken kinapinget. Kuna daytoy, rumbeng nga agtignay ken sumilpo kadagiti makintengnga a pwersa para iti signipikante a suporta— para iti taraon ken tapno maituloy ti panagtalon ken produksyon. Kagiddan daytoy, kasapulan nga itultuloy a singiren ti aso-aso a rehimen iti kinaawan kumpensasyon iti danyos bunga ti krisis.

“Iti pundamental, nasken a pakapsuten ti aso-aso a rehimen iti pagilyan ken ti imperyalismo a US, babaen ti panangiyabante ti demokratiko a rebolusyon ti umili,” pablaak ti PKM. Rumbeng a sungbatan ti PKM ti panagpaadu iti mapasampa iti New People’s Army ken panagsanay kadagiti masa nga aktibista a mannalon para iti demokratiko a rebolusyon ti umili.

Iyaw-awag met daytoy a dagus nga ipatungpal ken epektibo nga imatonan ti panangiyabante ti rebolusyon agraryo tapno masigurado ti suplay ti taraon ken dadduma pay a pagkasapulan ti komunidad. Kasapulan met a buklen ken irekober dagiti timpuyog ti masa ken dagiti komite a rebolusyonaryo iti baryo, kuna daytoy.

“Ti balligi ti demokratiko a rebolusyon ti umili, nga addaan sosyalista a perspektiba ti pangmabayagan a solusyon ken wayawaya iti krisis ti imperyalismo iti intero a lubong,” segun iti PKM.