Madama a sumangsango dagiti Masbatenyo iti pinainget a militarisasyon ken panaglabsing iti karbengan-tao kalpasan nga agigabsuon ti nayon a tropa ti Armed Forces of the Philippines (AFP) iti isla. Idi Marso, indeklara ti 903rd IBde ti Masbate bilang “priority area” da.

Simmangpet iti prubinsya ti 65th IB idi Pebrero. Simmaruno a nainayon ti nasurok 200 tropa ti 903rd IBde idi Marso 13 tapno agisayangkat ti operasyon kombat iti kabanbantayan ti Dumalinding, ti bantay a mangsilsilpo iti tallo nga ili ti Palanas, Dimasalang ken Cataingan.

Kagiddan daytoy, iyar-aramid da met ti Modified Community Support Sustainment Program (MCSSP) kadagiti sentro ti siyam a baryo ti Palanas. Saan a bumaba iti walo a soldado ti nakapakat iti tunggal barangay. Paulit-ulit nga ipapaayab da dagiti residente tapno pumauneg iti ubbaw a programa a panagpasuko iti AFP.

Nasurok-kumurang 30 tropa ti madama a nakakampo iti plasa ken barangay hall iti Barangay San Carlos idiay Palanas bayat nga agur-uray da a malpas ti itaktakder da a command post. Madama met nga agop-operasyon ti militar iti ili ti Cawayan ken Placer ken barangay iti ili ti Esperanza ken Pio V. Corpuz.

Perwisyo kadagiti mannalon

Idi Marso 10, naiyulat ti panangimula ti buteng dagiti elemento ti 2nd IB kadagiti eskwelaan ti Barangay Libertad, Cawayan. Nakita met dagiti 65th IB a mangmangted ti polyeto a napno ti disimpormasyon ken inuulbod iti Barangay Estampar iti ili ti Cataingan.

Nagiyebkas ti panagdanag dagiti residente ti San Carlos idiay Palanas iti panaginom ken panagbartek dagiti soldado agingga nga agpappaputok da iti paltog iti pangpubliko a lugar. Inyulat met dagiti residente ti panagsarbeylans, pammutbuteng ken panagipila ti pinarbo a kaso laban kadagiti kapamilya ti at-atapen da a kameng ti New People’s Army (NPA). Pilpiliten met dagiti soldado dagiti sibilyan a “napasurender” da tapno agserbi nga aset paniktik iti lugar ken direkta a makipaset kadagiti operasyon kombat.

Segun ken Ka Luz del Mar, tagapagsarita ti NPA-Masbate (Jose Rapsing Command), nakissayan ti oras dagiti mannalon iti panagsapul ken bimmassit ti birok da gapu kadagiti patakaran ti militar kadagiti barangay. Nayon a parigat isuda iti sagsagabaen tatta ti masa a Masbatenyo a krisis iti tengnga ti agkakangato a presyo dagiti gagatangen gubway ti imperyalista a gera ti US iti Middle East ken kinainutil ti rehimen Marcos.