Minilyon idiay US ken ginasut a ribo idiay Europe ti dimmar-ay iti nagsisina a protesta kadagitoy napalabas a lawas tapno kundenaren ti sumaksaknap ken uming-inget a pasismo ken rasismo kadagiti pagilyan da. Aktibo a dimmar-ay kadagitoy a tignay dagiti Pilipino iti sidong ti grupo a Migrante iti Europe ken Tanggol Migrante Movement idiay US.

Idiay US, agarup 8 milyon nga umili ti dimmar-ay iti maikatlo a protesta a “No Kings” idi Marso 2 kas panangkundenar iti panagari-ari ni Trump. Dimmanon iti 3,300 a protesta ti nairekord idiay US. Nasurok dua a milyon ti dimmar-ay iti nasao a tignay nu idilig iti napalabas a “No Kings” idi Oktubre 25, 2025.

Binabalaw da ti mangirurumen nga addang na ken kinaawan sungsungbatan kadagitoy. Kabilang ditoy ti pananggera iti Middle East, panangkamat kadagiti migrante ken imigrante, panangkissay kadagiti serbisyo a panggimong ken panangakup ti kinabaknang ti pamilya na ken kakunsabos da a dadakkel a korporasyon. Iti ruar ti US, napasamak dagiti protesta laban ken Trump idiay France, Portugal, Germany, Italy ken Greece.

Idiay United Kingdom (UK), dumanon iti kagudwa a milyon ti nagmartsa agturong iti Houses of Parliament idi met laeng Marso 28 kas panagsupyat iti rasismo ken turongen nga ultra Kannawan iti pagilyan. Daytoy ti kadakkelan a protesta laban kadagiti pwersa nga ultra-nasyunalista ken kontra-migrante iti pakasaritaan ti UK.

Adda iti 500 a grupo kabilang dagiti unyon, grupo a kontra iti rasismo ken mangibagi kadagiti komunidad ti Muslim ti nagkaykaysa tapno isayangkat ti aktibidad.