Sumangsango ti umili ti Cuba iti awan kapada a panagsagaba gubway ti oil embargo nga inpataw ti rehimen Trump ti US iti pagilyan tapno “tagikwaen” ken piliten ti gubyerno daytoy a sumurot iti pagayatan na. Nakaro ti epekto daytoy iti transportasyon, ken iti taray dagiti ospital ken pasilidad medikal, eskwelaan, turismo ken produksyon ti taraon ti pagilyan. Kaudyan laeng daytoy iti awan sarday a panangip-ipit ti US iti 66 tawen a naranggas a sangsyon iti ekonomya nga inpataw daytoy iti Cuba manipud idi nagballigi ti rebolusyon ditoy idi 1959 laban iti diktadura a US-Batista.

Imbes nga agrukma, nagtignay ti gubyerno ti Cuba tapno punwan ti dakkel a depisit iti enerhiya, babaen ti panag-arangkada ti bukod a produksyon ti krudo a langis ken napaspas a panangitakder kadagiti pasilidad a solar ken geothermal. Inaramid a prayoridad ti estado dagiti ospital ken pasilidad pangsalun-at, produksyon ti taraon ken dagiti basaran a serbisyo kadagiti bulnerable iti gimong kas kadagiti natataengan, ubbing ken masikog.

Labes pay ditoy, inpakita ti umili a Cuban ti militante ken anti-imperyalista a panagkaykaysa da. Kinundenar da ti embargo nga inawagan da a maysa a “saan a patas, brutal ken manangidadanes nga agresyon” ti imperyalismo a US. Kunada a kasdiay la unay ti kinaranggas ti atake na gapu ta ammo ti US a ti rebolusyonaryo a gubyerno ti Cuba ket saan nga agrukma, natibker ti sistema a panggimong da ken napudno iti hustisya a panggimong ken pannakikaykaysa da iti umili.

Agsasaruno dagiti patriyotiko a tignay dagiti Cuban tapno salakniban ti soberanya da. Adda dagiti rabii nga agtataripnong da tapno kundenaren ti US, awit ti rinibo a kandila. Kaudyan kadagiti dadakkel a tignay iti pagilyan ti napasamak idi Abril 2, nu sadinno a nagturong iti sango ti embahada ti US idiay Havana ti rinibo a Cuban, a nakalugan kadagiti bisikleta ken elektroniko a bisikleta ken awit dagiti bandera ti pagilyan da. Kadwa da iti tignay ti presidente a ni Miguel Diaz-Canel.

Saan nga agkupas a suporta

Manipud Enero agingga Marso, nagbuyat ti suporta a pulitikal ken materyal iti Cuba. Nagisayangkat kadagiti protesta ken aktibidad kas suporta iti Cuba ken panangkundenar iti imperyalismo a US dagiti progresibo a grupo, dagiti unyon, estudyante ken dagiti grupo a sumupsuporta iti Latin America idiay Belgium, UK, Canada, Spain, Malaysia, kasta met kadagiti syudad iti US. Umaw-awag da para iti panagikkat iti sangsyon iti ekonomya.

Idiay Africa, binisita dagiti progresibo a grupo ti 31 embahada ti Cuba tapno ipadanun ti pannakikaykaysa iti umili ditoy.

Idi Marso 18-20, nasurok 600 aktibista manipud 38 a pagilyan ken 140 organisasyon ti simmangpet iti Cuba tapno agitulod ti agdagup ti 20 tonelada nga ayuda ken suporta iti pulitika. Karaman kadagiti awit da a tulong ti taraon, agas, usar-medikal, baterya, solar panel ken bisikleta.

Indeklara dagiti grupo ti Marso 21 kas “Sangalubongan nga Aldaw ti Pannakikaykaysa iti Cuba,” a giniddanan dagiti koordinado a tignay iti nadumaduma a paset ti lubong.

Nayon ditoy, simmangpet iti pagilyan idi Marso 24 ti tallo a barko manipud iti nadumaduma a pagilyan iti Latin America nga addaan awit nga ayuda. Sakbay daytoy, nagipatulod ti Mexico ti nasurok 1,200 tonelada a taraon ken dadduma pay a suplay. Nagkari ni Claudia Sheinbaum, presidente ti Mexico, a balbaliw a mangipatulod ti langis iti pagilyan. Ti Mexico ket maysa kadagiti mayor a suplayer ti langis iti Cuba a nagsardeng a mangipatulod gapu iti presyur ti US.

Idi Marso 30, simmangpet iti Cuba ti oil tanker ti pagilyan a Russia nga addaan awit a 730,000 bariles ti langis. Sumangpet metten iti pagilyan ti maikadwa a tanker da nga addaan awit a 27,000 tonelada ti gas. Nagkari ti Russia nga agtuloy daytoy nga agipatulod ti ayuda iti laksid ti blokeyo ti US. Nagipatulod met ti ayuda dagiti pagilyan iti Caribbean, ti China, Canada, Brazil, Italy ken ti mano nga organisasyon manipud iti US.

Nu man pay saan nga umanay dagiti ayuda tapno naan-anay a mapalag-an ti panasagaba ti umili ti Cuba, awit daytoy ti sangalubongan a suporta iti soberanya da ken nainget a panagkundenar iti naulpit ken kriminal a nadagsen a panagdusa ti rehimen Trump ti US iti umili a Cuban.