Nagprotesta ti Agham, dagiti estudyante ken propesyunal iti tay-ak ti syensya, teknolohiya, inhinyeriya ken matematika idi Marso 25 iti sango ti UP Asian Institute of Tourism. Kinundenar da ti plano a panangitakder ti eksperimento ken kunektado iti militar ti US a nuclear reactor iti daga ti UP Diliman idiay Quezon City.

Idi Marso 2025, nangbukel ti katulagan ti Philippine Nuclear Research Institute (PNRI) ken Valar Atomics para iti panangitakder ti 100-kilowatt micro reactor a maaw-awagan a “Ward One.” Ti proyekto ket iyuna ti Valar Atomics Research Institute, subsidyaryo ti Valar iti Pilipinas. Ti bassit a planta ket saan a pangsuplay ti kuryente nu di ket eksperimento laeng para kadagiti komersyal a reactor iti masangwanan.

Ti Valar Atomics ket ponpondoan ti Anduril Industries, kumpanya nga agar-aramid ti moderno nga armas ken teknolohiya iti US. Ti direkta a silpo ti Valar Atomics ken Anduril Technology iti militar ti US ket mangipaspasimudaag nu kasano nga aramaten ti teknolohiya iti masangwanan.

Ti plano ket paset ti panangiduron ti rehimen US-Marcos a maadaan ti agan-andar a planta a nukleyar iti pagilyan inton 2032. Nakaipasidong met daytoy iti 123 Agreement for Civil Nuclear Energy Cooperation ti Pilipinas ken US.

Kabayatanna, maangay idiay Taguig City inton Mayo ti maikadwa a World Nuclear Supply Chain Conference. Iyuna daytoy ti World Nuclear Association tapno patibkeren ti sangalubongan a suplay para kadagiti proyekto a nukleyar. Iti pannakitinnulong ti aso-aso a rehimen Marcos, maiyam-ammo ditoy a taripnong dagiti kumpanya a nukleyar ti US iti Asia.