Iti nadumaduma a paset ti lubong, nagtignay dagiti partido ken organisasyon idi Marso 28 tapno iyawag ti pananggibus iti Operation Kagaar (wenno maudi agubat) ti Brahmanical Hindutva a pasista a rehimen ni Narendra Modi iti India. Nakikammayet da iti umili nga Indian ken Adivasi (katutubo) a punpuntiryaen ti naulpit ken nadara a kampanya ti panangikuspil a nangrugi idi Enero 2024.

Iti awag ti International Committee to Support the People’s War in India (ICSPWI), dimmar-ay iti aldaw ti tignay dagiti pwersa manipud iti Brazil, Bangladesh, Finland, Mexico, the Netherlands, Pilipinas, Switzerland, United Kingdom ken US. Nagiwaras da kadagiti polyeto, nagipaskil kadagiti poster, nagisab-it kadagiti istrimer, nagipintor kadagiti awag iti pader, nagtalantan ken nagprotesta da tapno allukoyen ti ad-adu nga umili a tumakder para kadagiti Indian ken Adivasi.

Kabilang kadagiti aktibo a nakipaset iti kampanya ti anti-imperyalista nga alyansa nga International League of Peoples’ Struggle (ILPS) ken ti Commission on Indigenous Peoples and National Minorities daytoy wenno ILPS Commission 10.

Ti nadara a “maudi a gubat”

Ti Operation Kagaar ket paset ti kabuklan a panangpakaro ti pasismo ti estado ti India iti sidong ti Surajkund Scheme (2022). Daytoy ket maysa a kampanya a kontra-insurhensya nga addaan deklarado a panggep a rebbeken ti armado a rebolusyonaryo a panaglaban ti umili nga Indian nga idadaulwan ti Communist Party of India o CPI (Maoist) iti agtapos ti Marso 2026.

Nakabalangkas daytoy iti doktrina nga US counterinsurgency ken direkta a kasilpo ti US Indo-Pacific Strategy. Nayon ditoy, paypaypayan ti operasyon ti panatisismo iti relihiyon para iti pasista a represyon ti rehimen a Brahmanical Hindutva nga idadaulwan ni Modi.

Iti sidong ti Kagaar, nasurok 750 indibidwal, kangrunaan dagiti Adivasi idiay Central India, ti minasaker ti rehimen Modi. Rinibo met ti inaresto ken inbalud ti armado a pwersa ti estado kadagiti agtutuon a kaso ken panangawag kadakwada a “terorista.”

Dagiti komunidad dagiti katutubo ket naipasidong iti kampanya ti panagpasuko ket panagpilit a makitinnulong iti militar. Dagiti kabakiran ken komunidad ket natatek ti ginasut a kampo militar nga immakto a protektor dagiti korporasyon a multinasyunal nga agkamkamkam kadagiti tawid a daga ken mangsamsamsam iti kalikasan. Kabayatanna, saan a manmano a kadre ken lider ti CPI (Maoist) ken ti People’s Liberation Guerilla Army (PLGA) ti nagbalin a biktima ti kinaranggas ti Kagaar. Kadawyan a modus ti rehimen Modi ti panagaresto kadakwada, panangipasidong iti nakaro a tortyur sakbay a patayen bayat nga adda iti kustodiya ti militar ken pulis. Dagitoy ket nakakaro a panaglabsing iti internasyunal a makatao a linteg.

Pannakikaykaysa ti CPP ken NPA

Iti sango ti deklarado a panggep ti rehimen Modi a gibusan ti CPI (Maoist) ken PLGA iti agtapos ti Marso 2026, balbaliw a pinasingkedan ti Communist Party of the Philippines, New People’s Army ken sibubukel a rebolusyonaryo a tignay Pilipino ti suporta kadakwada. Segun ken Marco Valbuena, dadaulo nga upisyal iti impormasyon ti Partido, natalek ti rebolusyonaryo a tignay Pilipino a marimbawan ken agballigi ti rebolusyonaryo a tignay nga Indian laban iti Kagaar. “Agingga nga agtultuloy ti panaggundaway, lumaban ti umili,” kunana.

Indilig ni Valbuena ti Kagaar kadagiti pasista a taktika nga idikdiktar ti US nga ar-aramaten daytoy laban iti umili a Pilipino iti unos ti adu a dekada iti sidong ti nadumaduma a rehimen agingga iti agdama a rehimen US-Marcos. Kunana, ti umili nga Indian ken Pilipino ket agpada a mangipakpakita ti kinatured iti pannakilaban iti terorismo ken panangidadanes, a nakasagana a sumango iti amin a kinarigat ken agidaton kadagiti kasapulan a sakripisyo.

Nayon ni Valbuena, ti nabanwar a panaglaban ti umili nga Indian ken dagiti rebolusyonaryo a pwersa daytoy ket mangmangted inspirasyon iti umili a Pilipino nga ipingpinget ti armado a dangadang.

Iti tengnga ti maysa a lubong a daydayyegen dagiti gubat a rinugyan, sinugsogan wenno sinuportaran dagiti imperyalista, kasapulan la unay nga agkaykaysa ti umili nga Indian ken Pilipino ken iyabante ti dangadang da para iti nailyan a wayawaya ken demokrasya. Ti pannakawayawaya ti India ken Pilipinas manipud iti imperyalista a panangidadanes ken dominasyon ket agserbi a maysa a nakapatpateg a kontribusyon iti sangalubongan a dangadang laban iti imperyalismo ken para iti wayawaya ken sosyalismo.