Dua a sibilyan ti pinatay ken innem ti iligal nga inaresto dagiti pwersa ti estado manipud tengnga a paset ti Marso agingga Abril 7. Kabayatanna, naranggas a dinuprak ti kapitalista ti tignay dagiti mangmangged iti maysa a pabrika iti Laguna.

Pammapatay. Idiay Sorsogon, pinatay dagiti elemento ti 31st IB ni James Quiñones, 24 anyos a mangmangged, bayat nga agur-uray ti bangka agturong iti sentro ti ili idiay Barangay Juan Andre, Donsol idi Marso 25. Parparwaren dagiti militar a ti biktima ket napuntaan ti naiyaw-awan a bala, nga iliblibak ti pamilya gapu ta natatek ti bala ti bagi na.

Idiay Negros Oriental, natay iti panagpadara ti mannalon a ni Edgar Tingting, 50, iti Barangay Trinidad, Guihulngan City idi Marso 17 kalpasan a paltogan ti 62nd IB bayat a mangruruot ti kanen ti baka. Parparwaren ti 62nd IB a ni Tingting ket Nalabbaga a mannakigubat a natay iti maysa nga engkwentro.

Idiay Negros Occidental, pinatudwan ti bala ti 79th IB ti maysa a mannalon idiay Barangay Minautok, Calatrava idi Abril 6. Saan pay a sigurado ti kasasaad ti biktima. Parparwaren ti militar a nag-engkwentro da iti New People’s Army (NPA).

Panagaresto. Idiay Occidental Mindoro, inaresto ti 68th IB ni Charlize Garzon wenno Ceeka idi Marso 29 idiay Sityo Salafay, Barangay Monteclaro, San Jose. Inakusaran da isuna a kameng ti NPA a natiliw kalpasan ti maysa a labanan. Ni Garzon ket maysa a pangkultura nga aktibista. Nagturpos isuna iti kurso nga AB Arts Management iti De La Salle College of St. Benilde ken napaayan ti pammadayaw a magna cum laude. Iti pagbaludan, inpasidong da iti pisikal ken mental a tortyur ken linabsing da ti karbengan na.

Idiay Iloilo, inaresto ti pinagtipon a pwersa ti militar ken pulis da Josephine Porquia, 64, ken Ma. Luisa Tagamolila Guillen, 62, iti pagdagdagusan da a balay idiay Barangay Aganan, Pavia idi Abril 2.

Ni Porquia, dati a koordineytor ti grupo a Migrante, ket sumangsango iti kaso a rebelyon nga naipila idi pay 2012. Tapno itantan iti pagbaludan, parparwaren da a nakumpiskar kenkwana dagiti pasabog ken pinilaan da ti kaso nga iligal a panagmanupaktura, panaglako ken panagikut ti eksplosibo. Ni Guillen, kameng ti Gabriela ket napilaan ti kaso nga obstruction of justice. Naruk-at isuna idi Abril 3.

Idiay Pasay City, iligal nga inaresto ken nasurok makalawas nga inbalud ti Pasay City Philippine National Police ti tallo a residente a nagprotesta idi Marso 23 iti sango ti Pasay City Hall. Ti tallo ket kabilang iti Wowee Market Vendors Association a sumupsupyat iti panagserra ti Wowee Market. Nakaruar da idi Marso 31.

Panagduprak iti protesta. Idiay Laguna, naranggas a naduprak ken nabomba ti danum dagiti agprotprotesta a mangmangged ti PackageWorld Inc., sanikwa ni Lucio Tan, iti Laguna Technopark Special Economic Zone idiay Cabuyao idi Marso 23. Kalpasan ti maysa nga aldaw, naikkat iti trabaho ti 139 a mangmangged a kontraktwal iti kumpanya. Ti protesta ket inyuna ti PackageWorld Inc. Workers Union-Independent laban iti deadlock ken panagbarat ti kumpanya ti collective bargaining agreement. Ti PackageWorld Inc ket agar-aramid kadagiti ramit a pangpakete para kadagiti produkto a mainom ken dadduma pay. Daytoy ket paset ti kumpanya nga Asia Brewery Incorporated.