Kadagiti tinnalantan, produksyon ken babassit a taripnong a kadwa ti masa a mannalon iti kaaw-awayan, linagip ti New People’s Army (NPA) ti maika-57 anibersaryo daytoy idi Marso 29. Rinambakan ti Nalabbaga a hukbo dagiti nagun-od daytoy a balligi iti napalabas a tawen, bayat a naanep nga umad-adaw kadagiti adal manipud kadagiti sinagrap a pannakapaay.

Didiay met laeng nga aldaw, inpakita ti NPA ti kabaelan a salakniban ti bagbagi idi rauten ti 68th IB ti yunit daytoy iti Barangay Monteclaro, San Jose, Occidental Mindoro. Napatay iti labanan ti upisyal militar a ni Capt. Dean Buen Oyando bayat a nasugatan ti dua pay.

Iti panangidaulo ti Communist Party of the Philippines ken tarabay ti tignay panagilinteg, agtultuloy a papaayen ti NPA ti narungsot a pasista a panagatake ti rehimen US-Marcos laban iti hukbo ti umili ken iti umili a lumablaban iti kaaw-awayan ken kasyudadan. Manipud idi nairuswat ti tignay panagilinteg, ad-adu dagiti positibo a kapadasan ngem iti negatibo iti rebolusyonaryo nga armado dangadang.

Iti tarabay ti Partido, ken iti sango ti ad-adda a miserable a kasasaad ti umili, ad-adda a timmibker ken ngimmato ti rebolusyonaryo a pakinakem ken pangngeddeng dagiti Nalabbaga a mannakigubat ti NPA nga ilaban ken salakniban ti masa a maidadanes ken magungundawayan. Bunga daytoy, naimatangan iti napalabas a tawen ti umad-adu a kabataan, agpada iti kaaw-awayan ken kasyudadan, a sumungsungbat iti awag a sumuporta ken agkameng iti hukbo ti umili. Tuluy-tuloy a manaynayunan daytoy ti baro a dara a mangmangted ti baro a regta iti panangiyabante ti armado a dangadang.

Nangabarwan met iti panagpinget ti NPA iti balbaliw a panangipablaak iti pagiwarnak a Pulang Bandila. Umuna a rimwar ti pagiwarnak idi 1985 ken mano a dekada a nagsardeng. Balbaliw nga ipabpablaak ti Nailyan a Kumand iti Operasyon babaen ti Departamento iti Pulitika daytoy. Segun iti hukbo, ti panangiruar iti pagiwarnak ket kagiddan ti determinado a panangiyabante ti armado a rebolusyon a kontribusyon iti rebbengen daytoy nga ibagsak ti aso-aso ken pasista a rehimen US-Marcos.

Sibubukel a talek ken suporta iti NPA

Manipud kadagiti kabanbantayan, kapatagan, syudad, nailyan a kabisera agingga ballasiw-taaw, inyebkas ti National Democratic Front (NDF) ken dagiti alyado nga organisasyon daytoy ti naragsak a kablaaw kadagiti ipatpateg a Nalabbaga a kumander ken mannakigubat ti NPA. Nagiyaramid da kadagiti martsa, taripnong, tinnalantan ken operasyon dikit-operasyon pinta idiay Metro Manila, Cordillera, Pampanga, Southern Tagalog, Bicol ken Cebu. Tampok kadagitoy ti dua a martsa dagiti rebolusyonaryo a grupo idiay Manila. Adda met dagiti aktibidad idiay Australia, Hong Kong, Netherlands, New Zealand ken US.

“Kanayon kami a nakasagana nga agpaadu ken agkonsolida kadagiti organisasyon mi para iti armado a dangadang ken mangibinglay ti ad-adu a Nalabbaga a kumander ken mannakigubat iti hukbo ti umili,” inrakurak ni Elias Dipasupil, kabuklan a kalihim ti NDF.

Indeklara ti Pambansang Katipunan ng mga Magbubukid ti saan nga agkupas a talek ken suporta na iti hukbo ti umili, ken ti sapata nga igaed da a makibinnadang iti hukbo iti panangpalapad iti rebolusyonaryo a tignay mannalon kadagiti larangan gerilya. Ad-adda met nga ikagumaan ti Revolutionary Council of Trade Unions nga agserbi a bubon ti pinullo a ribo a bilang dagiti rebolusyonaryo a mangmangged a mangidaulo iti gubat ti umili.

Inawat ti Kabataang Makabayan (KM) ti karit nga agserbi a para-itulod ti baro a dara ken regta iti NPA. Nakasagana da a dalyasaten ti naunday ken narikut a dana tapno iyabante ti gubat ti umili.

Naan-anay ti inyebkas a suporta ti NDF-Metro Manila iti NPA. Manipud iti nailyan a kabisera, ikagkagumaan ti grupo nga organisaen dagiti mangmangged, nakurapay ken kabataan tapno agturong iti kaaw-awayan.

Nangidanun met ti kablaaw iti anibersaryo ti NPA ti dadduma pay nga alyado ti NDF kabilang ti Artista at Manunulat ng Sambayanan, Christians for National Liberation, Compatriots, Cordillera People’s Democratic Front, Katipunan ng mga Gurong Makabayan, Liga ng Agham para sa Bayan ken Makabayang Kilusan ng Bagong Kababaihan.

Nagpadayaw met iti hukbo ti umili ti Friends of the Filipino People in Struggle ken dagiti balangay daytoy iti intero a lubong. Sumagmamano a gangannaet a partido ken organisasyon manipud iti Afghanistan, Bangladesh, Brazil, Ireland ken Ukraine ti nagkablaaw iti anibersaryo ti NPA.