Nasurok makabulanen ti narungsot a panagbombomba ti imperyalismo a US ken Zionista nga estado ti Israel laban iti Iran. Napaay ti mauyong a pasista a kriminal a ni Donald Trump, presidente ti US, iti deklarado a panggep a pagrukmaen ti Iran ken isuko ti kinabaknang na a langis iti kontrol ti imperyalismo a US.

Nasuroken 16,000 a bomba ti intennag ti US ken Israel idiay Iran. Sinirig na ti imprastruktura a militar ti Iran, ngem pinuntirya met daytoy dagiti pasdek a panggubyerno ken pangkomersyo, dagiti kabalbalayan, pagadalan ken unibersidad, ospital, laboratoryo, dagiti rangtay, pabrika, planta a pang-enerhiya ken nukleyar, pasilidad ti danum, istorikal a lugar ken dadduma pay nga imprastruktura a sibilyan. Nasuroken a 2,400 Iranian ti napatay, kabilang ti ginasut nga ubbing, ken nasurok 25,000 ti nasugatan. Addan iti 3 milyon ti naiyabog manipud iti pagtaengan da.

Nainget a lablabanan ti pagilyan nga Iran ti awan-ressat nga agresyon militar ti US ken Israel. Iti laksid ti sinagrap da a dangran, ti Iran ket agtultuloy a makaitentennag kadagiti moderno nga eroplano a panggubat ti US, ken makapatpatayab kadagiti misayl ken drone a tumamtama kadagiti pasilidad ken pasdek iti Israel, uray kadagiti base militar ti US ken upisina dagiti kumpanya nga Amerikano idiay Bahrain, Jordan, Kuwait, Qatar, Saudi Arabia ken UAE. Tengtenglen daytoy ti Strait of Hormuz, estratehiko a kanal nu sadinno nga agay-ayus ti 20% ti kabuklan a linnakwan iti langis, tapno ipiten ti sangalubongan nga ekonomya, ken iti kasta ket italmeg ti US ken Israel tapno gibusan dan ti pananggera iti Iran.

Iti panagkedked nga agtamed ken sumuko, papaayen ti pagilyan nga Iran ti gagem ti imperyalismo a US nga agari iti Middle East. Saan a naala ni Trump ti suporta dagiti kaalyado na a pagilyan iti NATO. Palalo tatta a maisinsina ti US ken Israel iti intero a lubong. Ad-adda nga immuna ti binnusor iti intar dagiti imperyalista. Dagiti oligarkiya iti pinansya ken monopolyo kapitalista ket agak-akup ti higante a ganansya iti gera, iti panangsuporta iti linnakwan ti armas ti industriya a militar, ispekulasyon ken panagtayok iti presyo ti langis ken panangpapigsa iti dolyar. Nalawa a krisis ken panagrigat ti ituntunda daytoy iti umili ken intero a lubong.

Uray iti uneg ti US, tumaktakder ti umili nga Amerikano laban iti gera nga agresyon iti Iran. Itay nabiit, nagturong iti kalsada ti nasurok walo a milyon a mangilaklaksid ken Trump. Agsasaruno dagiti pinadisi ni Trump a heneral ti militar, a ti dadduma ket kunkunada a saan nga umanamong iti panagraut (ti US) iti Iran. Iti sango ti pannakapaay a pagrukmaen ti Iran ken ipataw ti pangngeddeng na, bimmaw-ing ni Trump iti nasabrak a panagisawang ken panagpangta a patudwan daytoy ti bomba ti Iran ken pabettaken dagiti rangtay ken dagiti addang nga agdadata a krimen iti sangkataw-an.

Iti sango ti panangiwasiwas ti imperyalismo a US iti brutal a pwersa a militar a mangrabrabngis iti nailyan a panagwaywayas ti Iran, ken sakbay daytoy ket ti Venezuela, uray ti Cuba, Palestine ken dadduma pay a pagilyan, kasapulan a tumakder ken agtignay ti intero nga umili a Pilipino laban iti imperyalista a panaggubgubat ti US a mangilugluges iti karbengan dagiti pagilyan a mangiruprupir ti wayawaya manipud iti imperyalista a dominasyon ken kontrol. Kasapulan a reppeten ti kalapadan nga intar ti umili laban iti imperyalista a panagraraut ti US. Kasapulan nga ibunannag dagiti inuulbod ken disimpormasyon nga isaksaknap ti imperyalismo a US ken ti aso-aso daytoy a rehimen Marcos.

Nasken a sipipigsa a babalawen ti umili a Pilipino ti imperyalismo a US ken Zionista nga estado ti Israel iti panangbaddek iti soberanya dagiti pagilyan nga agwaywayas, ken ti panagkamkam iti gameng a langis ti Iran. Rumbeng a suportaran ken makikaykaysa iti umili nga Iran iti panaglaban da iti agresyon militar ti imperyalismo a US. Pagsungbaten ti pasista a mauyong a ni Trump ken dagiti upisyal na, kadagiti krimen da iti sangkataw-an kanaig iti narungsot a panagbomba a nangpuntirya kadagiti sibilyan. Kasapulan a kagiddan a batikusen ti umili a Pilipino ti Zionista nga estado ti Israel, iti panagbomba ken panagraut dagiti tropa daytoy iti Lebanon ken ti pwersado a panagpatalaw iti maysa a milyon a Lebanese iti pagtaengan ken daga da, ken ti agtultuloy a panagbomba idiay Gaza Strip, iti laksid ti panagraira ti ceasefire.

Batikusen ti imperyalismo a US ken labanan ti tuluy-tuloy a panagsagana ken panangsugsog daytoy ti gera. Saan a maanawa tatta ti US iti panangpadakkel ti presensya a militar daytoy iti Asia-Pacific, kagiddan ti panangipit ken panangprobokar ti susik iti China, kasapakat ti Japan ken dadduma pay a pagilyan. Ar-aramaten ti US dagiti base militar daytoy iti Pilipinas, Japan ken South Korea tapno agpwesto ken papigsaen ti presensya na iti kabaybayan iti aglikmot ti China. Tuluy-tuloy a bukbukbokan ni Trump ti pondo ti militar. Manipud $1 trilyon, plano nga ingato ti badyet daytoy agturong ti $1.5 trilyon iti sumaruno a tawen.

Ti pannakikaykaysa ti umili a Pilipino iti panaglaban iti imperyalista a pananggera ti US iti Iran, Venezuela ken dadduma pay a pagilyan ket laban met iti nailyan a panagwaywayas ken kinatalged ti Pilipinas. Kasapulan a batikusen ti umili a Pilipino ti aso-aso a rehimen Marcos iti panagkedked daytoy a kundenaren ti pananggubat ti US ken Zionista nga estado ti Israel idiay Iran.

Kas met nu kasano nga inaramat ti US dagiti base militar iti nadumaduma a pagilyan iti Middle East tapno isayangkat ti panagraut iti Iran, sigurado nga usaren met ti US dagiti base militar daytoy iti Pilipinas tapno iyaramid ti interbensyon ken agresyon militar iti Asia-Pacific iti masangwanan. Iti kasta, nasken a papigsaen ti pukkaw tapno dupraken dagiti base ken sikreto a pasilidad militar ti US iti pagilyan, supyaten ti permanente a presensya ti rinibo a tropa nga Amerikano, ti panangikabil iti Pilipinas kadagiti misayl ken dadduma pay nga armas, ti plano nga ipasdek a pabrika ti armas ken dadduma pay. Rumbeng a sipipinget a labanan ti plano nga iyaramid a Balikatan war exercises manipud tatta Abril, nga agpapada a nakaturong iti panangiparang ti bileg a militar ti US iti China.

Iti sango ti umum-uneg a krisis ti sangalubongan a sistema a kapitalista, sigurado a bumtak pay ti ad-adu nga armado a binnusor kadagiti umay a panawen. Ngarud, nakair-irut ti pagkasapulan a mabukel ti sangalubongan nga anti-imperyalista a panagkaykaysa dagiti umili tapno labanan ti imperyalista a panaggubgubat ti US, ken iyabante ti rebolusyonaryo a dangadang para iti nailyan a wayawaya, demokrasya ken sosyalismo.