Ha mga talakayan, produksyon, ngan guti nga katitirok kaupod an masa nga parag-uma ha kabaryuhan, ginsalin-urog han Bagong Hukbong Bayan (BHB) an ika-57 nga anibersaryo hini hadton Marso 29. Ginselebrar han Pula nga hukbo an nakab-ot hini nga mga kadaugan ha nakalabay nga tuig, samtang tukma nga napurot hin mga leksyon tikang ha nahiaguman nga mga kapaitan.

Hiton liwat nga adlaw, ginpakita han BHB an kapas nga depensahan an kalugaringon han atakihon han 68th IB an yunit hini ha Barangay Monteclaro, San Jose, Occidental Mindoro. Napatay ha agway an upisyal militar nga hi Capt. Dean Buen Oyando samtang nasamaran an duha nga iba pa.

Ha pamumuno han Partido Komunista ng Pilipinas ngan giya han kagiusan pagtutul-id, padayon nga ginpapakyas han BHB an waray wantas nga pasista nga pangatake han rehimen US-Marcos kontra ha hukbo han katawhan ngan ha katawhan nga naato ha kabaryuhan ngan kasyudaran. Tikang han iglansar an kagiusan pagtutul-id, mas landaw an nagin mga positibo nga eksperyensya ha rebolusyunaryo nga armado nga pakig-away tanding ha negatibo.

Ha giya han Partido, ngan ha atubangan han mas tinalumpigos nga kamutangan han katawhan, dinig-on ngan hinitaas an rebolusyunaryo nga diwa ngan determinasyon han mga Pula nga mangaraway han BHB nga ipakigbisog ngan depensahan an masa nga rinaugdaug ngan tiniyupi. Bunga hini, nakit-an ha naglabay nga tuig an tikadamo nga mga kabatan-unan, ngaduha ha kabaryuhan ngan kasyudaran, nga nabaton ha panawagan nga sumuporta ngan umapi ha hukbo han katawhan. Dirudiretso ini nga nadudugngan hin bag-o nga dugo nga nahatag hin bag-o nga rayhak ha pagpapasulong han armado nga pakig-away.

Panibag-o nga paningkamot liwat han BHB an utro nga pagpapagawas ha mantalaan nga Pulang Bandila. Syahan nga gin-gawas an mantalaan hadton 1985 ngan pira kadekada nga nahunong. Utro ini nga igin-gagawas han Nasyunal nga Kumand ha Operasyon pinaagi han Pampulitika nga Byuro hini. Sigon ha hukbo, an pagpapagawas han mantalaan kadungan han determinado nga pagpapasulong han armado nga rebolusyon nga amot hini ha buruhaton nga ibagsak an niyutiyo ngan pasista nga rehimen US-Marcos.

Bug-os nga pagtapod ngan suporta ha BHB

Tikang ha mga kabukiran, kapatagan, syudad, nasyunal nga sentro nga syudad tubtub ha langyaw nga labnasan, iginpahayag han National Democratic Front (NDF) ngan mga alyado nga organisasyon hini an malipayon nga pagbati ha mga hinigugma nga Pula nga kumander ngan mangaraway han BHB. Naghimo hira han mga martsa, katitirok, talakayan ngan operasyon dikit-operasyon pinta ha Metro Manila, Cordillera, ha Pampanga, Southern Tagalog, Bicol, ngan ha Cebu. Landaw hini an an duha nga martsa han mga rebolusyunaryo nga grupo ha Manila. Mayda liwat mga aktibidad ha Australia, Hong Kong, Netherlands, New Zealand, ngan US.

“Pirme kami andam nga magpadamo ngan magkonsolida han amon mga organisasyon para ha armado nga pakig-away ngan mag-amot hin mas damo nga Pula nga kumander ngan mangaraway ha hukbo han katawhan,” pahayag ni Elias Dipasupil, pankabug-usan nga sekretaryo han NDF.

Gindeklara han Pambansang Katipunan ng mga Magbubukid an diri nagpapapas nga pagtapod ngan suporta hini ha hukbo han katawhan, ngan an saad nga maniningkamot nga bumulig ha hukbo ha pagpapahilapad ha rebolusyunaryo nga kagiusan nga parag-uma ha mga prente gerilya. Mas maniningkamot liwat an Revolutionary Council of Trade Unions para magserbe nga atabay han narunapulo kayukot nga ihap han mga rebolusyunaryo nga trabahador nga mamumuno ha gerra han katawhan.

Ginkarawat han Kabataang Makabayan (KM) an ayat nga magserbe nga surok han bag-o nga dugo ngan rayhak ha BHB. Andam hira nga hasugon an maiha ngan kumplikado nga dalan agud ipasulong an gerra han katawhan.

Bug-os gud an ginpahayag nga suporta han NDF-Metro Manila ha BHB. Tikang ha nasyunal nga sentro nga syudad, naniningkamot an grupo para organisahon an mga trabahador, kablas, ngan kabatan-unan para kumadto ha kabaryuhan.

Napaabot liwat hin pagbati ha anibersaryo han BHB an iba pa nga alyado han NDF kaupod an Artista at Manunulat ng Sambayanan, Christians for National Liberation, Compatriots, Cordillera People’s Democratic Front, Katipunan ng mga Gurong Makabayan, Liga ng Agham para sa Bayan, ngan Makabayang Kilusan ng Bagong Kababaihan.

Nagpasidungong liwat ha hukbo han katawhan an Friends of the Filipino People in Struggle ngan mga tsapter hini ha bug-os nga kalibutan. Pira nga langyaw nga partido ngan organisasyon tikang ha Afghanistan, Bangladesh, Brazil, Ireland, ngan Ukraine an binati ha anibersaryo han BHB.