Duha nga sibilyan an ginpatay ngan unom an iligal nga gin-aresto han mga pwersa han estado tikang butnga nga parte han Marso tubtub Abril 7. Samtang, madarahug nga ginbungkag han kapitalista an paggios han mga trabahador ha usa nga pabrika ha Laguna.

Pagpatay. Ha Sorsogon, ginpatay han mga elemento han 31st IB hi James Quiñones, 24 anyos nga trabahador, samtang naghuhulat han baloto tipakadto ha sentro han bungto hadton Marso 25 ha Barangay Juan Andre, Donsol. Ginpapagawas han mga militar nga naigo an biktima han waog nga bala nga ginpapahimuwa han pamilya tungod kay tadtad han bala an iya lawas.

Ha Negros Oriental, namatay ha pagdinugo an parag-uma nga hi Edgar Tingting, 50, ha Barangay Trinidad, Guihulngan City hadton Marso 17 kahuman pusilon han 62nd IB samtang nangunguha hin banwa nga pagkaon han baka. Ginpapagawas han 62nd IB nga Pula nga mangaraway hi Tingting nga namatay ha usa nga engkwentro.

Ha Negros Occidental, ginpauranan han bala han 79th IB an usa nga parag-uma ha Barangay Minautok, Calatrava hadton Abril 6. Diri pa segurado an kamutangan han biktima. Ginpapagawas han militar nga nagka-engkwentro giutan hini ngan han Bagong Hukbong Bayan (BHB).

Pag-aresto. Ha Occidental Mindoro, gin-aresto han 68th IB hi Charlize Garzon o Ceeka hadton Marso 29 ha Sityo Salafay, Barangay Monteclaro, San Jose. Gin-akusaran hiya nga membro han BHB nga nadakop kahuman han usa nga agway. Hi Garzon usa nga pankultura nga aktibista. Nakahuman hiya han kurso nga AB Arts Management ha De La Salle College of St. Benilde ngan ginpasidunggan nga magna cum laude. Ha prisuhan, ginpailarum hiya ha pisikal ngan mental nga tortyur ngan gintatalapas an iya mga katungod.

Ha Iloilo, gin-aresto han magkatig-ob nga mga pwersa ng militar ngan pulis hira Josephine Porquia, 64, ngan Ma. Luisa Tagamolila Guillen, 62, ha ira gin-uukyan nga balay ha Barangay Aganan, Pavia hadton Abril 2.

Hi Porquia, hadto anay koordineytor han grupo nga Migrante, naatubang ha kaso nga rebelyon nga ginsalawad hadton 2012 pa. Agud igpabilin ha prisuhan, ginpapagawas nga nakumpiska ha iya an mga pampasabog ngan ginsalawdan han kaso nga iligal nga pagmamanupaktura, pagbabaligya, ngan pananag-iya han eksplosibo. Hi Guillen, membro han Gabriela, ginsalawdan han kaso nga obstruction of justice. Nakagawas hiya hadton Abril 3.

Ha Pasay City, iligal nga gin-aresto ngan masobra usa kasemana nga ginpriso han Pasay City Philippine National Police an tulo nga residente nga nagprotesta hadton Marso 23 ha atubangan han Pasay City Hall. An tulo kaupod ha ranggo han Wowee Market Vendors Association nga natipa ha pagpapaserra han Wowee Market. Nakagawas hira hadton Marso 31.

Pagbungkag ha protesta. Ha Laguna, madarahug nga ginbungkag ngan ginbomba han tubig an mga nagpoprotesta nga trabahador han PackageWorld Inc., pananag-iya ni Lucio Tan, ha Laguna Technopark Special Economic Zone ha Cabuyao hadton Marso 23. Kataliwan han pira kaadlaw, gintanggal ha trabaho an 139 nga trabahador nga kontraktwal ha kompaniya. Ginpangunahan an protesta han PackageWorld Inc. Workers Union-Independent kontra ha deadlock ngan pambabarat han kompaniya han ira collective bargaining agreement. Naghihimo an PackageWorld Inc han mga kagamitan nga pampakete para ha mga produkto nga irimnon ngan iba pa. Kaparte ini han kompaniya nga Asia Brewery Incorporated.