Milyun-milyon ha US ngan gatus-gatos kayukot ha Europe an pinartisipar ha bublag nga mga protesta hini nga nakataliwan nga mga semana agud kundenahon an natikahiluag ngan natikagrabe nga pasismo ngan rasismo ha ira mga nasud. Aktibo nga pinartisipar hini nga mga paggios an mga Pilipino ilarum han grupo nga Migrante ha Europe ngan Tanggol Migrante Movement ha US.

Ha US, gintatantiya nga aada ha 8 kamilyon nga katawhan an pinartisipar ha ikatulo nga protesta nga “No Kings” hadton Marso 28 komo pagkundenar ha pagpostura nga “hadi” ni Trump. Inabot ha 3,300 nga protesta an nahilista ha US. Mas damo hin duha kamilyon an pinartisipar ha nasering nga paggios itanding ha nakalabay nga “No Kings” hadton Oktubre 25, 2025.

Ginsukna nira an mapanmuypoy niya nga mga pitad ngan kawaray baratunon dinhi. Kalakip dinhi an pang-gegerra ha Middle East, paglanat ha mga migrante ngan imigrante, pag-iban ha mga serbisyo nga pankatilingban ngan paghakin han karikuhan han iya pamilya ngan kakunsabo nga dagko nga korporasyon. Ha gawas han US, nagkamayda hin mga protesta kontra ha Trump ha France, Portugal, Germany, Italy ngan Greece.

Ha United Kingdom (UK), inabot ha katunga kamilyon an nagmartsa tipakadto ha Houses of Parliament hadton Marso 28 liwat komo pagtipa ha rasismo ngan huyob nga ultra Tuo ha nasud. Ini an pinakadako nga protesta kontra ha mga pwersa nga ultra-nasyunalista ngan kontra-migrante ha kasaysayan han UK.

Aada ha 500 nga grupo, kaupod an mga unyon, grupo nga kontra ha rasismo ngan tinaglawas han mga komunidad han Muslim an nagkaurusa agud ilansar an aktibidad.