Nagprotesta an Agham, mga estudyante ngan propesyunal ha natad han siyensya, teknolohiya, inhinyeriya ngan matematika hadton Marso 25 ha atubangan han UP Asian Institute of Tourism. Ginkundenar nira an plano nga pagtitindog han eksperimento ngan kunektado ha militar han US nga nuclear reactor ha katunaan han UP Diliman ha Quezon City.

Hadton Marso 2025, nagbug-os han kasarabutan an Philippine Nuclear Research Institute (PNRI) ngan Valar Atomics para ha pagtitindog han 100-kilowatt micro reactor nga gintatawag nga “Ward One.” Ginpapangunahan an proyekto han Valar Atomics Research Institute, subsidyaryo han Valar ha Pilipinas. An guti nga planta diri pansuplay han kuryente kundi eksperimento la para ha mga komersyal nga reactor ha tidaraon.

An Valar Atomics ginpopondohan han Anduril Industries, kompaniya nga naghihimo hin moderno nga armas ngan teknolohiya ha US. An direkta nga sumpayan han Valar Atomics ngan Anduril Technology ha militar han US pangilal-an han kun tiunan-o gagamiton an teknolohiya ha tidaraon.

Kaparte an plano han pagduduso han rehimen US-Marcos nga magkamayda hin naandar nga nukleyar nga planta ha nasud ha 2032. Nakapailarum liwat ini ha 123 Agreement for Civil Nuclear Energy Cooperation han Pilipinas ngan US.

Samtang, hihimuon ha Taguig City ha Mayo an ikaduha nga World Nuclear Supply Chain Conference. Pangungunahan ini han World Nuclear Association agud padig-unon an pankalibutan nga suplay para ha mga nukleyar nga proyekto. Kabakyang an papet nga rehimen Marcos, igtatanyag dinhi an mga nukleyar nga kompaniya han US ha Asia.