Ha magkalain-lain nga dapit han kalibutan, ginios an mga partido ngan organisasyon hadton Marso 28 agud ipanawagan an paghuman ha Operation Kagaar (o katapusan nga gerra) han pasista nga Brahmanical Hindutva nga pasista nga rehimen ni Narendra Modi ha India. Nakig-usa hira ha katawhan Indian ngan Adivasi (katutubo) nga gintatarget han madarahug ngan madugo nga kampanya han panmuypoy nga nagtikang hadton Enero 2024.

Ha panawagan han International Committee to Support the People’s War in India (ICSPWI), pinartisipar ha adlaw han paggios an mga pwersa tikang ha Brazil, Bangladesh, Finland, Mexico, the Netherlands, Pilipinas, Switzerland, United Kingdom ngan US. Nanhatag hira han mga polyeto, nagpaskin han mga poster, nagsab-ong han mga istrimer, nagpinta han mga panawagan ha pader, nagtalakayan ngan nagprotesta para aghaton an mas damo nga katawhan nga tumindog para ha mga Indian ngan Adivasi.

Kaupod ha mga aktibo nga pinartisipar ha kampanya an kontra-imperyalista nga alyansa nga International League of Peoples’ Struggle (ILPS) ngan an Commission on Indigenous Peoples and National Minorities hini o ILPS Commission 10.

An madugo nga “katapusan nga gerra”

An Operation Kagaar kaparte han kabug-usan nga pagpapagrabe han pasismo han estado han India ilarum han Surajkund Scheme (2022). Usa ini nga kampanya kontra-insurhensiya nga mayda deklarado nga katuyuanan nga puuhon ha katapusan han Marso 2026 an armado nga rebolusyunaryo nga pag-ato han katawhan nga Indian nga ginpapamunuan han Communist Party of India o CPI (Maoist).

Nakabalayan ini ha doktrina nga US counterinsurgency ngan direkta nga kasumpay han US Indo-Pacific Strategy. Dugang dinhi, ginpapaypayan han operasyon an panatisismo ha relihiyon para ha pasista nga panmuypoy han rehimen Brahmanical Hindutva nga ginpapamunuan ni Modi.

Ha ilarum han Kagaar, masobra 750 nga indibidwal, prinsipal mga Adivasi ha Central India, an ginmasaker han rehimen Modi. Yukut-yukot liwat an gin-aresto ngan ginpriso han armado nga pwersa han estado ha luun-luon nga mga kaso ngan pagbabansag ha ira komo “terorista.”

Iginpailarum an mga komunidad han mga minoriya ha kampanya han tinagdamo nga pagpapasurender ngan panmirit nga makigbuligay ha militar. Gintadtad an mga kagugub-an ngan komunidad han gatus-gatos nga kampo militar nga inakto nga protektor han mga korporasyon nga multinasyunal nga nanlupot ha mga ansestral nga tuna ngan nadambong ha kalibungan.

Samtang, diri pipira nga mga kadre ngan lider han CPI (Maoist) ngan han People’s Liberation Guerilla Army (PLGA) an nagin biktima han kamadarahug han Kagaar. Kaagsuban nga modus han rehimen Modi an pag-aresto ha ira, pagpapailarum ha grabe nga tortyur antes patayon samtang aada ha kustodiya han militar ngan pulis. Mga grabe nga pagtalapas ini ha internasyunal nga makatawo nga balaud.

Pakikig-usa han PKP ngan BHB

Atubangan han deklarado nga katuyuanan han rehimen Modi nga tatapuson an CPI (Maoist) ngan PLGA ha katapusan han Marso 2026, utro nga ginpadig-on han Partido Komunista ng Pilipinas, Bagong Hukbong Bayan ngan bug-os nga rebolusyunaryo nga kagiusan Pilipino an suporta ha ira. Sigon kan Marco Valbuena, puno nga upisyal ha impormasyon han Partido, natapod an rebolusyunaryo nga kagiusan Pilipino nga mauungbawan ngan magdadaug an rebolusyunaryo nga kagiusan nga Indian kontra ha Kagaar. “Tubtub nga nagpapadayon an paniniyupi, maato an katawhan,” sering niya.

Igintanding ni Valbuena an Kagaar ha mga pasista nga taktika nga gindidikta han US nga gin-gagamit kontra ha katawhan Pilipino ha sakob han damo nga dekada ha ilarum han magkalain-lain nga rehimen tubtub ha presente nga rehimen US-Marcos. Sering niya, an katawhan nga Indian ngan Pilipino pareho nga nagpapakita han kaisog ha pakikigbisog ha terorismo ngan panraugdaug, nga andam umatubang ha ngatanan nga kakurian ngan maghalad han mga ginkikinahanglan nga sakripisyo.

Dugang ni Valbuena, gintatagan inspirasyon han mabayanihon nga pag-ato han katawhan nga Indian ngan han mga rebolusyunaryo nga pwersa hini an katawhan Pilipino nga igpadayon an armado nga pakig-away hin mayda mas makusog nga kamaduroto.

Ha butnga han usa nga kalibutan nga ginbabay-og han mga gerra nga gintikangan, ginsulsulan, o ginsuportahan han mga imperyalista, kinahanglan gud nga magkaurusa an katawhan nga Indian ngan Pilipino ngan ipasulong an ira mga pakigbisog para ha nasyunal nga katalwasan ngan demokrasya. An pagtatalwas han India ngan Pilipinas tikang ha imperyalista nga pandarahug ngan dominasyon magseserbe nga usa nga importante kaupay nga kontribusyon ha pankalibutan nga pakigbisog kontra ha imperyalismo ngan para ha katalwasan ngan sosyalismo.