Naatubang an katawhan han Cuba ha waray katupong nga pag-inantos durot han oil embargo nga gin-imponer han rehimen Trump han US ha nasud agud “angkunon” ngan puguson an gubyerno hini nga sumunod ha iya karuyagon. Grabe an nagin epekto hini ha transportasyon, ngan ha dalagan han mga ospital ngan medikal nga pasilidad, eskoylahan, turismo, ngan produksyon han pagkaon han nasud. Pinakaurhi la ini ha waray hunong nga pan-gigipit ha 66 katuig han madarahug nga sangsyon ha ekonomiya nga gin-imponer han US ha nasud tikang han magdaug an rebolusyon hini hadton 1959 kontra ha diktadura nga US-Batista.

Imbes nga yumukbo, ginios an gubyerno han Cuba agud pun-an an dako nga alkanse ha enerhiya, pinaagi han pagpabuylo han kalugaringon nga produksyon han krudo nga lana ngan madagmit nga pagtitindog han mga pasilidad nga solar ngan geothermal. Ginhimo nga prayoridad han estado an mga ospital ngan pankalibsugan nga pasilidad, produksyon han pagkaon, ngan mga batakan nga serbisyo ha mga bulnerable ha katilingban sugad han kalagsan, bata ngan burod.

Labaw hini, ginpakita han katawhan nga Cuban an ira militante ngan kontra-imperyalista nga pagkakaurusa. Ginkundenar nira an embargo nga gintawag nira nga usa nga “asimetriko, brutal ngan matalumpiguson nga agresyon” han imperyalismo nga US. Sugad nala an brutalidad han atake, sering nira, tungod kay maaram an US nga diri masurender an rebolusyunaryo nga gubyerno han Cuba, madig-on an sistema nga pankatilingban hini ngan tangkod ini ha pankatilingban nga hustisya ngan pagkakaurusa.

Susrunod an patriyotiko nga paggios han mga Cuban para depensahan an soberaniya. Mayda mga gab-i nga nagtitirok hira para kundenahon an US, dara an gatus-gatos nga kandila. Pinakaurhi ha tinagdako nga paggios ha nasud an nahitabo hadton Abril 2, diin kinadto ha atubangan han embahada han US ha Havana an yukut-yukot nga Cuban, sakay han ira bisikleta ngan elektroniko nga bisikleta ngan dara an mga bandera han ira nasud. Kaupod nira ha paggios an ira presidente nga hi Miguel Diaz-Canel.

Diri nagpapapas nga suporta

Tikang Enero tubtub Marso, binuhos an pampulitika ngan materyal nga suporta ha Cuba. Naglansar han mga protesta ngan aktibidad komo suporta ha Cuba ngan pagkundenar ha imperyalismo nga US an mga progresibo nga grupo, mga unyon, estudyante ngan mga grupo nga nasuporta ha Latin America ha Belgium, UK, Canada, Spain, Malaysia, ngan mga syudad ha US. Nananawagan hira para ha pagtanggal ha sangsyon ha ekonomiya.

Ha Africa, ginbisita han mga progresibo nga grupo an 31 nga embahada han Cuba agud ipaabot an ira pakig-usa ha katawhan hini.

Hadton Marso 18-20, masobra 600 nga aktibista tikang ha 38 nga nasud ngan 140 nga organisasyon an inabot ha Cuba agud magdul-ong han aada ha 20 katonelada nga ayuda ngan suporta ha pulitika. Kalakip ha dara nira nga bulig an pagkaon, medisina, higamit-medikal, baterya, solar panel, ngan bisikleta.

Gindeklara han mga grupo an Marso 21 komo “Pankalibutan nga Adlaw han Pakikig-usa ha Cuba,” nga ginduyugan han mga koordinado nga paggios ha magkalain-lain nga dapit han kalibutan.

Dugang dinhi, inabot ha nasud hadton Marso 24 an tulo nga barko tikang ha magkalain-lain nga nasud ha Latin America nga mayda dara nga ayuda. Antes pa hini, nagpadara an Mexico hin masobra 1,200 katonelada nga pagkaon ngan iba pa nga suplay. Nagsaad hi Claudia Sheinbaum, presidente han Mexico, nga utro nga magpapadara han lana ha nasud. An Mexico an usa ha mayor nga tagasuplay han lana ha Cuba nga hinunong nga magdul-ong han lana tungod ha presyur han US.

Hadton Marso 30, inabot ha Cuba an oil tanker han nasud Russia nga mayda dara nga 730,000 kabariles han lana. Tiabot na liwat ha nasud an ira ikaduha nga tanker nga mayda dara nga masobra 27,000 katonelada han gas. Nagsaad an Russia nga padayon ini nga magpapadara han ayuda ha luyo han blokeyo han US. Nagpadara liwat hin ayuda an mga nasud ha Caribbean, an China, Canada, Brazil, Italy, ngan pira nga organisasyon tikang ha US.

Bisan kun diri masadang an mga ayuda agud hul-os nga tanggalon an pag-inantos han katawhan han Cuba, dara hini an pankalibutan nga suporta ha ira soberaniya ngan mahugot nga pagkundenar ha madarahug ngan kriminal nga kolektibo nga pagsirot han rehimen Trump han US ha katawhan nga Cuban.