Sa mga panaghisgot, produksyon ug gagmayng panagtigom kauban ang masang mag-uuma sa kabanikanhan, gisaulog sa Bagong Hukbong Bayan (BHB) ang ika-57 nga anibersaryo niini niadtong Marso 29. Gisaulog sa Pulang hukbo ang mga kadaogan nga nakab-ot sa milabayng tuig samtang tukmang gikutlo ang mga pagtulun-an gikan sa mga pait nga nasinati.

Sa maong adlawa, gipakita sa BHB ang katakus niining magdepensa sa kaugalingon sa dihang giatake sa 68th IB ang usa ka yunit sa Barangay Monteclaro, San Jose, Occidental Mindoro. Napatay sa engkwentro ang opisyal sa militar nga si Capt. Dean Buen Oyando samtang nasamdan ang duha pa.

Ubos sa pagpangulo sa Partido Komunista ng Pilipinas ug sa giya sa kalihukang pagtul-id, padayong gipakyas sa BHB ang walay puas nga pasistang pagpanumpo sa rehimeng US-Marcos batok sa hukbong bayan ug sa katawhan nga nakigbisog sa kabanikanhan ug kasyudaran. Sukad gilunsad ang kalihukang pagtul-id, labi nang daghan ang positibong kasinatian sa rebolusyonaryong armadong pakigbisog kaysa negatibo.

Ubos sa paggiya sa Partido, ug atubangan sa nagkagrabe nga kahimtang sa katawhan, labing milig-on ug mikusog ang rebolusyonaryong diwa ug determinasyon sa mga Pulang manggugubat sa BHB nga ipakigbisog ug panalipdan ang masang dinaogdaog ug pinahimuslan. Bunga niini, nasaksihan sa milabayng tuig ang nagkadaghang mga kabatan-onan, gikan sa kabanikanhan ug kalungsuran, nga mitubag sa panawagan nga mosuporta ug mosalmot sa hukbong bayan. Padayon kini nga nadugangan og bag-ong dugo nga naghatag og bag-ong kusog sa pagpaasdang sa armadong pakigbisog.

Bag-ong paningkamot usab sa BHB ang subling pagpagula sa mantalaang Pulang Bandila. Unang migula kini niadtong 1985 ug pila ka dekadang nahunong. Subli kining gimantala sa Pambansang Kumand sa Operasyon pinaagi sa Kawanihang Pampulitika niini. Sumala sa hukbo, ang paggula sa mantalaan lambigit sa determinadong pagpaasdang sa armadong rebolusyon, nga tampo niini sa tahas nga ibagsak ang papet ug pasistang rehimeng US-Marcos.

Tibuok pagsalig ug suporta sa BHB

Gikan sa mga kabukiran, kapatagan, syudad, nasudnong kapital ug gawas sa nasud, gipahayag sa National Democratic Front (NDF) ug mga alyadong organisasyon niini ang ilang mainitong pagtimbaya sa minahal nga mga Pulang kumander ug manggugubat sa BHB. Naglunsad sila og mga martsa, panagtigom, diskusyon ug operasyon-dikit sa Metro Manila, Cordillera, Pampanga, Southern Tagalog, Bicol ug Cebu. Tataw dinhi ang duha ka martsa sa mga rebolusyonaryong grupo sa Maynila. Aduna usab mga aktibidad sa Australia, Hong Kong, Netherlands, New Zealand ug US.

“Kanunay kaming andam nga magpadaghan ug magkonsolida sa among mga organisasyon alang sa armadong pakigbisog ug magtampo og dugang Pulang kumander ug manggugubat sa hukbong bayan,” matud ni Elias Dipasupil, pangkalahatang kalihim sa NDF.

Gideklarar sa Pambansang Katipunan sa mga Magbubukid ang ilang dili mahubsan nga pagsalig ug suporta sa hukbong bayan, ug ang ilang saad nga maningkamot nga motabang sa hukbo sa pagpalapad sa rebolusyonaryong kalihukan sa mag-uuma sa mga natarang gerilya. Labi usab nga maningkamot ang Revolutionary Council of Trade Unions aron mahimong tinubdan sa liboan ka rebolusyonaryong mamumuo nga magpangulo sa gubat sa katawhan.

Gidawat sa Kabataang Makabayan (KM) ang hagit nga mahimong tigtampo og bag-ong dugo ug kusog sa BHB. Andam sila nga mobagtas sa taas ug lisod nga dalan aron iasdang ang gubat sa katawhan.

Gipadayag usab sa NDF-Metro Manila ang ilang hugot nga suporta sa BHB. Gikan sa nasudnong kapital, naningkamot ang grupo nga organisahon ang mga mamumuo, kabus ug kabatan-onan aron moadto sa kabanikanhan.

Nagpadala usab og pag-abi-abi sa anibersaryo sa BHB ang ubang alyado sa NDF sama sa Artista ug Manunulat sa Sambayanan, Christians for National Liberation, Compatriots, Cordillera People’s Democratic Front, Katipunan sa mga Gurong Makabayan, Liga ng Agham para sa Bayan ug Makabayang Kilusan sa Bagong Kababaihan.

Naghatag saludo usab sa hukbong bayan ang Friends of the Filipino People in Struggle ug ang ilang mga balangay sa tibuok kalibutan. Pipila ka langyawng partido ug organisasyon gikan sa Afghanistan, Bangladesh, Brazil, Ireland ug Ukraine ang nagpadala og pagtimbaya.