Lahos usa kabulan na an waray wantas nga panmomba han imperyalismo nga US ngan Zionista nga estado han Israel kontra ha Iran. Pakyas an tuyaw nga pasista nga kriminal nga hi Donald Trump, presidente han US, ha deklarado nga katuyuanan nga paluhuron an Iran ngan igsurender an iya karikuhan nga lana ha kontrol han imperyalismo nga US.

Masobra 16,000 nga bomba na an ginhulog han US ngan Israel ha Iran. Ginpuntirya hini an imprastruktura nga militar han Iran, kundi ginpuntirya liwat an mga bilding nga pan-gubyerno ngan pankomersyo, mga kabablayan, mga eskoylahan ngan unibersidad, ospital, laboratoryo, mga tulay, pabrika, planta nga pan-enerhiya ngan nukleyar, pasilidad nga pantubig, pankasaysayan nga lugar, ngan iba pa nga imprastruktura nga sibilyan. Masobra 2,400 nga Iranian na an napatay, kaupod an gatus-gatos nga kabataan, ngan masobra 25,000 an samaran. Aada ha 3 kamilyon na an natabrog ha ira puruy-anan.

Mahugot nga gin-aatuhan han nasud Iran an waray hunong nga panmilitar nga agresyon han US ngan Israel. Ha luyo han nahiaguman nga hiluagan nga destroso, an Iran padayon nga nakakapabagsak han mga moderno nga pan-gerra nga edro han US, ngan nakakapalupad han mga misayl ngan drone nga naigo ha mga pasilidad ngan bilding ha Israel, hasta na ha mga base militar han US ngan upisina han mga kompaniya nga Amerikano ha Bahrain, Jordan, Kuwait, Qatar, Saudi Arabia ngan UAE. Ginkakatinan hini an Strait of Hormuz, estratehiko nga gawasan ha tubig diin naagi an 20% han kabug-usan nga negosyuhay ha lana, agud piiton an pankalibutan nga ekonomiya, ngan ha sugad mapugos an US ngan Israel nga tapuson na ang pan-gegerra kontra ha Iran.

Ha pagdiri nga yumukbo ngan sumurender, ginpapakyas han nasud Iran an larang han imperyalismo nga US nga umungbaw ha Middle East. Waray makuha ni Trump an suporta han mga kaalyado nga nasud ha NATO. Sobra yana nga nahihimulag an US ngan Israel ha bug-os nga kalibutan. Mas natikahilarum an sumpakiay giutan han mga imperyalista. Naghahakin han higante nga tubo an oligarkiya ha pinansya ngan mga monopolyo kapitalista ha gerra, ha pagsuporta ha pagbaligya han armas han industriya nga militar, ispekulasyon ngan tigda nga paghitaas han presyo han lana, ngan pagpapakusog han dolyar. Hiluag nga krisis ngan paghimakuri an durot hini ha katawhan ha bug-os nga kalibutan.

Bisan ha sakob han US, natindog an katawhan nga Amerikano kontra ha gerra nga agresyon ha Iran. Diri pala maiha, nirabunos ha kakalsadahan an masobra walo kamilyon nga nagsasalikway kan Trump. Susrunod an ginpatalsik ni Trump nga mga heneral han militar, nga an iba ginsesering nga diri naabuyon ha pangatake ha Iran. Dugang nga natutuyaw an pasista nga hi Trump. Atubangan han kapakyasan nga payukbuon an Iran ngan ig-imponer an iya desisyon, pinaling hi Trump ha butaray nga pagyinakan ngan pananarhug nga pauuranan han bomba an Iran, ngan pasasabugan an mga tulay ngan mga planta nga pan-enerhiya, mga pitad nga butaray nga krimen ha bug-os nga katawhan.

Atubangan han pagwawasiwas han imperyalismo nga US han iya brutal nga panmilitar nga pwersa nga natamas-tamas ha nasyunal nga paglulugaring han Iran, ngan antes hini, han Venezuela, hasta na han Cuba, Palestine ngan iba pa nga mga nasud, kinahanglan manindugan ngan gumios an bug-os nga katawhan Pilipino kontra ha imperyalista nga pan-gegerra han US nga natamak ha katungod han mga nasud nga nag-iinsister han katalwasan tikang ha imperyalista nga dominasyon ngan kontrol. Kinahanglan ig-urusa an pinakahilapad nga ranggo han katawhan kontra ha imperyalista nga pan-gegerra han US. Kinahanglan ibuksas an mga buwa ngan disimpormasyon nga ginpapasamwak han imperyalismo nga US ngan han papet nga rehimen Marcos.

Kinahanglan bug-os-kusog nga suknaon han katawhan Pilipino an imperyalismo nga US ngan Zionista nga estado han Israel ha pagtampalasan ha soberaniya han mga nasud nga naglulugaring, ngan an paghakin ha karikuhan nga lana han Iran. Kinahanglan suportahan ngan makig-usa ha katawhan han Iran ha ira pakigbisog ha panmilitar nga agresyon han imperyalismo nga US. Papagbatunon an pasista nga tuyaw nga hi Trump ngan an iya mga upisyal, ha ira mga krimen ha bug-os nga katawhan kasumpay han waray wantas nga panmomba nga napunting ha mga sibilyan. Kinahanglan kadungan nga suknaon han katawhan Pilipino an Zionista nga estado han Israel, ha panmomba ngan pag-atake han mga tropa hini ha Lebanon ngan an pwersahay nga pagpapalayas ha usa kamilyon nga Lebanese ha ira urukyan ngan tuna, ngan an padayon nga panmomba ha Gaza Strip, ha luyo han pag-eksister han ceasefire.

Suknaon an imperyalismo nga US ngan atuhan an dirudiretso hini nga pangandam ngan panunulsol han gerra. Waray wantas yana an US ha pagpapadako han panmilitar nga presensya hini ha Asia-Pacific, kadungan han pan-gigipit ngan panunulsol han sumpakiay ha China, kakunsabo an Japan ngan iba pa nga nasud. Gin-gagamit han US an mga base militar hini ha Pilipinas, Japan ngan South Korea agud magpusisyon ngan pakusgon an presensya ha kadagatan ha palibot han China. Dirudiretso nga ginbubuhusan ni Trump han pondo an militar. Tikang $1 katrilyon, plano nga pahitas-on an badyet hini ngadto ha $1.5 katrilyon ha masunod nga tuig.

An pakikig-usa han katawhan Pilipino ha pag-ato ha imperyalista nga pan-gegerra han US ha Iran, Venezuela ngan iba pa nga nasud pakigbisog liwat para ha nasyunal nga paglulugaring ngan katalwasan han Pilipinas. Kinahanglan suknaon han katawhan Pilipino an papet nga rehimen Marcos ha pagdiri hini nga kundenahon an pan-gegerra han US ngan Zionista nga estado han Israel ha Iran.

Sugad han tiunan-o gin-gamit han US an mga base militar ha magkalain-lain nga nasud ha Middle East agud ilansar an pangatake ha Iran, piho nga gagamiton liwat han US an mga base militar hini ha Pilipinas agud himuon an panginginlabot ngan panmilitar nga agresyon ha Asia-Pacific ha tidaraon. Ha sugad, kinahanglan pakusgon an guliat para bungkagon an mga base ngan mga sikreto nga pasilidad militar han US ha nasud, tipahan an permanente nga presensya han yukut-yukot nga tropa nga Amerikano, an pag-istak ha Pilipinas han mga misayl ngan iba pa nga armas, plano nga tindugon an pabrika han armas ngan iba pa. Kinahanglan pursigido nga atuhan an plano nga himuon nga Balikatan war exercises tikang yana nga Abril, nga ngatanan nakapokus ha pagpaparayaw han US kontra ha China.

Atubangan han natikahilarum nga krisis han pankalibutan nga sistema nga kapitalista, segurado nga mabuto an mas damo nga armado nga sumpakiay ha mga maabot pa nga panahon. Mahugot gud, kun sugad, nga mabug-os an pankalibutan nga kontra-imperyalista nga pagkakaurusa han mga katawhan agud atuhan an imperyalista nga pan-gegerra han US, ngan ipasulong an mga rebolusyunaryo nga pakigbisog para ha nasyunal nga katalwasan, demokrasya ngan sosyalismo.