Sa mga talakayan, produksyon, kag gagmay nga pagtililipon kaupod ang masa nga mangunguma sa kaumhan, gindumdom sang Bagong Hukbong Bayan (BHB) ang ika-57 nga anibersaryo sini sadtong Marso 29. Ginsaulog sang Pulang hangaway ang nalab-ot sini nga mga kadalag-an sang nagligad nga tuig, samtang husto nga nagakuha sang mga pagtulun-an sa gin-agum nga mga kabudlayan.

Sa adlaw man nga ini, ginpakita sang BHB ang ikasarang nga pangapinan ang kaugalingon sang salakayon sang 68th IB ang yunit sini sa Barangay Monteclaro, San Jose, Occidental Mindoro. Napatay sa awayan ang opisyal militar nga si Capt. Dean Buen Oyando samtang napilasan ang duha ka iban pa.

Sa pagpamuno sang Partido Komunista sang Pilipinas kag ubay sang kahublagan panadlong, padayon nga ginapaslaw sang BHB ang patarasak nga pasistang pagpang-atake sang rehimen US-Marcos batuk sa hukbo sang banwa kag sa pumuluyo nga nagapakig-away sa kaumhan kag kasyudaran. Sugod sang ilunsar ang kahublagan panadlong, mas madamo ang nangin mga positibo nga inagihan sa rebolusyonaryong armadong paghimakas sang sa negatibo.

Sa ubay sang Partido, kag sa atubang sang mas makaluluoy nga kahimtangan sang pumuluyo, mas nga nagalig-on kag nagataas ang rebolusyonaryong espirito kag desisyon sang mga Pulang hangaway sang BHB nga ipakig-away kag pangapinan ang masang pigos kag ginahimuslan. Bunga sini, nasaksihan sang nagligad nga tuig ang nagadamo nga mga pamatan-on, lunsay sa kaumhan kag kasyudaran, nga nagasabat sa panawagan nga magsuporta kag magpatapo sa hukbo sang banwa. Tayuyon ini nga nadugangan sang bag-o nga dugo nga nagahatag sang bag-o nga kapagsik sa pagpasulong sang armadong paghimakas.

Panibag-o nga pagtinguha man sang BHB ang liwat pagpaguwa sang pahayagan nga Pulang Bandila. Una nga nagguwa ang pahayagan sadtong 1985 kag pila ka dekada nga nauntat. Liwat ini nga ginbalhag sang Pungsodnon nga Kumand sa Operasyon paagi sa Departamento Pangpulitika sini. Suno sa hukbo,ang pagpaguwa sang pahayagan kaupod ang determinado nga pagpasulong sang armadong rebolusyon amot sini sa katungdanan nga pukanon ang papet kag pasista nga rehimen US-Marcos.

Lubos nga pagsalig kag suporta sa BHB

Halin sa kaumhan, kapatagan, syudad, pungsodnon nga sentro tubtob sa luwas sang pungsod, ginpahayag sang National Democratic Front (NDF) kag mga alyado nga organisasyon sini ang malipayon nga pagtamyaw sa mga pinalangga nga Pulang kumander kag hangaway sang BHB. Nagpatigayon sila sang mga martsa, pagtililipon, talakayan kag operasyon dikit-operasyon pinta sa Metro Manila, Cordillera, sa Pampanga, Southern Tagalog, Bicol, kag sa Cebu. Upod sa mga ini ang duha ka martsa sang mga rebolusyonaryong grupo sa Manila. May yara man mga aktibidad sa Australia, Hong Kong, Netherlands, New Zealand, kag US.

“Permi kami handa nga magpadamo kag magkonsolida sang amon mga organisasyon para sa armadong paghimakas kag mag-amot sang mas madamo nga Pulang kumander kag hangaway sa hukbo sang banwa,” pahayag ni Elias Dipasupil, heneral nga sekretaryo sang NDF.

Gindeklarar sang Pambansang Katipunan ng mga Magbubukid ang wala nagahupas nga pagsalig kag suporta sini sa hukbo sang banwa, kag ang sumpa nga magpanikasog nga magtimbang sa hukbo sa pagpalapad sa rebolusyonaryong kahublagan sang mangunguma sa mga larangan gerilya. Mas man nga magtinguha ang Revolutionary Council of Trade Unions agud magserbe nga bubon sang linaksa nga isip sang mga rebolusyonaryong mamumugon nga magpamuno sa inaway banwa.

Ginbaton sang Kabataang Makabayan (KM) ang hangkat nga magserbe nga tigdala sang bag-ong dugo kag kapagsik sa BHB. Handa sila nga usoyon ang madugay kag masalimuot nga banas agud isulong ang inaway banwa.

Bug-os ang ginpahayag nga suporta sang NDF-Metro Manila sa BHB. Halin sa pungsodnon nga sentro, nagtinguha ang grupo agud organisahon ang mga mamumugon, imol, kag pamatan-on para magkadto sa kaumhan.

Nagpadangat man sang pagtamyaw sa anibersaryo sang BHB ang iban pa nga alyado sang NDF lakip ang Artista at Manunulat ng Sambayanan, Christians for National Liberation, Compatriots, Cordillera People’s Democratic Front, Katipunan ng mga Gurong Makabayan, Liga ng Agham para sa Bayan, kag Makabayang Kilusan ng Bagong Kababaihan.

Nagsaludo man sa hukbo sang banwa ang Friends of the Filipino People in Struggle kag mga tsapter sini sa bug-os nga kalibutan. Pila ka dumuluong nga partido kag organisasyon halin sa Afghanistan, Bangladesh, Brazil, Ireland, kag Ukraine ang nagtamyaw sa anibersaryo sang BHB.