Ginkakaatubang yana han mga Masbatenyo an mas ginpapintas nga militarisasyon ngan pagtalapas ha tawhanon nga katungod kahuman magtambak han dugang nga tropa an Armed Forces of the Philippines (AFP) ha isla. Hadton Marso, gindeklara han 903rd IBde an Masbate komo “priority area” hini.

Inabot ha prubinsya an 65th IB hadton Pebrero. Sinunod nga gindugang an masobra 200 nga tropa tikang ha 903rd IBde hadton Marso 13 agud maglansar hin pankombat nga operasyon ha kabukiran han Dumalinding, an bukid nga nagsusumpay ha tulo nga bungto han Palanas, Dimasalang ngan Cataingan.

Kadungan hini, naghihimo liwat hin Modified Community Support Sustainment Program (MCSSP) ha mga sentro han siyam nga baryo han Palanas. Diri mamenos ha walo nga sundalo an nakadeploy ha kada barangay. Pauru-utro nira nga ginpapatawag an mga residente para magpasakob ha buwa nga programa nga pagpasurender han AFP.

Sumobra-kumulang 30 nga tropa an nagkakampo yana ha plasa ngan barangay hall ha Barangay San Carlos ha Palanas samtang naghuhulat nga mahuman an gintitindog nira nga command post. Nag-ooperasyon liwat yana an militar ha bungto han Cawayan ngan Placer ngan ha mga barangay ha bungto han Esperanza ngan Pio V. Corpuz.

Perwisyo ha mga parag-uma

Hadton Marso 10, ginreport an pagsasabrag hin kahadlok han mga elemento han 2nd IB ha mga eskoylahan ha Barangay Libertad, Cawayan. Nahikit-an naman an 65th IB nga nanhahatag han polyeto nga puno han disimpormasyon ngan buwa ha Barangay Estampar ha bungto han Cataingan.

Nagpahayag hin kabaraka an mga residente han San Carlos ha Palanas ha pag-inom ngan paghurubog han mga sundalo nga nahingangadto ha pagpapabuto han pusil ha pampubliko nga lugar. Ginreport liwat nira an pan-gigipit han mga sundalo, kalakip an sarbeylans, panhadlok ngan pagsalawad han hinimu-himo nga kaso kontra ha mga kaurupdan han gindududahan nga membro han Bagong Hukbong Bayan (BHB). Ginpipirit liwat han mga sundalo an mga sibilyan nga “napasurender” hini para magserbe nga aset paniktik ha lugar ngan direkta nga pumartisipar ha mga pankombat nga operasyon.

Sigon kan Ka Luz del Mar, tagapagyakan han BHB–Masbate (Jose Rapsing Command), naibanan an oras han mga parag-uma ha pagpapakabuhi ngan ginuti an ira kita tungod ha mga palisiya han militar ha mga barangay. Dugang nga pakuri hira ha gin-aaguman yana han masa nga Masbatenyo nga krisis ha butnga han nagtitikahitaas nga presyo han mga papliton dara han imperyalista nga gerra han US ha Middle East ngan kawaray pulos han rehimen Marcos.