Kasamtangang giatubang sa mga Masbatenyo ang mas grabeng militarisasyon ug paglapas sa tawhanong katungod human magbubo og dugang tropa ang Armed Forces of the Philippines (AFP) sa isla. Niadtong Marso, gideklarar sa 903rd IBde ang Masbate isip “priority area” niini.

Niabot sa prubinsya ang 65th IB niadtong Pebrero. Sunod nga gidugang ang kapin 200 ka tropa gikan sa 903rd IBde niadtong Marso 13 aron maglunsad og operasyong kombat sa kabukiran sa Dumalinding, ang bukid nga nagsumpay sa tulo ka lungsod sa Palanas, Dimasalang ug Cataingan.

Dungan niini, nagpahigayon usab sila og Modified Community Support Sustainment Program (MCSSP) sa sentro sa siyam ka baryo sa Palanas. Dili mokubos sa walo ka sundalo ang nakapakat sa matag baryo. Balik-balik nilang gipatawag ang mga residente aron mopaubos sa mini nga programa sa pagpasurender sa AFP.

Kapin sa 30 ka tropa ang kasamtangang nagkampo sa plasa ug barangay hall sa Barangay San Carlos, Palanas samtang naghulat nga mahuman ang ilang gitukod nga command post. Kasamtangang nag-operasyon usab ang militar sa lungsod sa Cawayan ug Placer ug sa mga barangay sa Esperanza ug Pio V. Corpuz.

Dangan sa mga mag-uuma

Niadtong Marso 10, gitaho ang pagpanghasi sa mga elemento sa 2nd IB sa mga eskwelahan sa Barangay Libertad, Cawayan. Nakita usab ang 65th IB nga nanghatag og polyeto nga puno sa disimpormasyon ug bakak sa Barangay Estampar, Cataingan.

Nagpahayag og kabalaka ang mga residente sa San Carlos, Palanas sa pag-inom ug paghubog-hubog sa mga sundalo nga moresulta sa pagpabuto og pusil sa publiko. Gitaho usab nila ang mga pagpamig-ot sa mga sundalo, lakip ang pagsurbeylans, pagpanghadlok ug pagpasaka og hinimo-himong kaso batok sa mga paryente sa gidudahang mga myembro sa BHB. Gipugos usab sa mga sundalo ang mga sibilyang “napasurender” nila nga moaktong aset paniktik ug direktang mosalmot sa mga operasyong kombat.

Sumala ni Ka Luz del Mar, tigpamaba sa BHB-Masbate (Jose Rapsing Command), nabawasan ang oras sa mga mag-uuma sa panginabuhi ug mikunhod ang ilang kita tungod sa mga palisiya sa militar sa mga barangay. Dugang palas-anon kini sa kasamtangang gikasinating krisis sa masang Masbatenyo taliwala sa sobra kataas nga presyo sa mga palaliton tungod sa imperyalistang gera sa US sa Middle East ug kawalay pulos sa rehimeng Marcos.