Nagprotesta ang Agham, mga estudyante kag propesyunal sa patag sang syensya, teknolohiya, inhinyeriya kag matematika sadtong Marso 25 sa atubang sang UP Asian Institute of Tourism. Ginkundenar nila ang plano nga pagtukod sang ekspermento kag kunektado sa militar sang US nga nuclear reactor sa kadutaan sang UP Diliman sa Quezon City.

Sadtong Marso 2025, naghimo sang kasugtanan ang Philippine Nuclear Research Institute (PNRI) kag Valar Atomics para sa pagtukod sang 100-kilowatt micro reactor nga ginatawag nga “Ward One”. Ang proyekto pagapangunahan sang Valar Atomics Research Institute, subsidyaryo sang Valar sa Pilipinas. Ang gamay nga planta indi pangsuplay sang kuryente kundi ekspermento lang para sa mga komersyal nga reactor sa palaabuton.

Ang Valar Atomics ginapondohan sang Anduril Industries, kumpaniya nga nagahimo sang moderno nga armas kag teknolohiya sa US. Ang direkta nga angot sang Valar Atomics kag Anduril Technology sa militar sang US nagapakita sa kon paano gamiton ang teknolohiya sa palaabuton.

Kabahin ini nga plano sa pagduso sang rehimen US-Marcos nga makaangkon sang nagagana nga plantang nukleyar sa pungsod sa 2032. Napaidalum man ini sa 123 Agreement for Civil Nuclear Energy Cooperation sang Pilipinas kag US.

Samtang, pagahiwaton sa Taguig City sa Mayo ang ikaduha nga World Nuclear Supply Chain Conference. Pagapangunahan ini sang World Nuclear Association agud palig-unon ang pangkalibutan nga suplay para sa mga proyektong nukleyar. Kabulig ang papet nga rehimen Marcos, ilibod diri ang mga kumpaniya nga nukleyar sang US sa Asia.