Nagprotesta ang Agham, mga estudyante ug propesyunal sa nataran sa syensya, teknolohiya, inhinyeriya ug matematika niadtong Marso 25 atubangan sa UP Asian Institute of Tourism. Gikundena nila ang planong pagtukod sa eksperimento ug kunektado sa militar sa US nga nuclear reactor sa yuta sa UP Diliman sa Quezon City.

Niadtong Marso 2025, naghimo og kasabutan ang Philippine Nuclear Research Institute (PNRI) ug Valar Atomics alang sa pagtukod og 100-kilowatt micro reactor nga gitawag og “Ward One”. Ang proyekto gipangunahan sa Valar Atomics Research Institute, subsidyaryo sa Valar sa Pilipinas. Ang gamay nga planta dili alang sa suplay sa kuryente kundili eksperimento lamang alang sa komersyal nga reactor sa umalabot.

Ang Valar Atomics gipondohan sa Anduril Industries, kumpanyang nagprodyus og abanteng armas ug teknolohiya sa US. Ang direktang koneksyon sa Valar Atomics ug Anduril sa militar sa US nagpakita kung unsaon ang paggamit sa teknolohiya sa umalabot.

Bahin kini sa plano sa rehimeng US-Marcos nga magtukod og aktibong plantang nukleyar sa nasud sa 2032. Nakailalom usab kini sa 123 Agreement for Civil Nuclear Energy Cooperation sa Pilipinas ug US.

Samtang, ipahigayon sa Taguig City sa Mayo ang ikaduhang World Nuclear Supply Chain Conference. Pangunahan kini sa World Nuclear Association aron mapalig-on ang internasyunal nga suplay alang sa mga proyektong nukleyar. Kaabin ang papet nga rehimeng Marcos, ibaligya dinhi ang mga kumpanyang nukleyar sa US sa Asia.