Nagprotesta sa upisina sa Land Transportation Office (LTO) sa Quezon City niadtong Disyembre 18 ang mga drayber sa bus gikan sa lain-laing kumpanya aron ipabasura ang dili makatarunganong Demerit Points System sa ahensya nga gipatuman niadto pang 2019. Gipangunahan ang protesta sa Manibela o Malayang Alyansa sa Bus Employees ug Laborers.

Nagpahamtang ang maong sistema, nga kabahin sa Republic Act 10930, sa doble-dobleng “demerit points” alang sa mga drayber sa pangpumblikong sakyanan kumpara sa pribadong mga sakyanan. Subay dinhi, kung makabaton ang usa ka drayber og 40 “demerit points” tungod sa mga “paglapas” sa balaod sa trapiko, pagabawion ang iyang lisensya sulod sa duha ka tuig.

Liboan ka mga drayber ug mamumuo sa bus ang naperwisyo ug gikabalak-ang mawad-an og trabaho tungod niini. Labaw kining migrabe sa milabayng mga bulan dihang nakigkunsabo ang mga lokal nga gubyerno ug coast guard sa pagpatuman sa palisiya. Duso nila, sala usab sa gubot nga sistema sa transportasyon kung nganong “gakalapas” sa mga drayber ang mga palisiya sa trapiko. Wala kunoy ginapatuman nga maayong lugar kung asa pwedeng mosakay ug monaug ang mga pasahero.