Subsub nga mga protesta ang gilunsad sa mga mamumuo sa panglawas ug sa ilang unyon sa pagpangulo sa Alliance of Health Workers (AHW) niining Disyembre. Senema nga naglunsad og mga protesta ang AHW sa mga ospital ug ahensya sa gubyerno.

Gikan Disyembre 5 hangtud Disyembre 12, naglunsad og protesta ang mga unyon sa Philippine Orthopedic Center, National Children’s Hospital, Philippine General Hospital, National Kidney and Transplant Institute, Philippine Heart Center, Lung Center of the Philippines ug Philippine Children’s Medical Center, Tondo Medical Center, Jose Reyes Memorial Medical Center, San Lazaro Hospital ug Fabella Hospital sa Metro Manila.

Niadtong Disyembre 13 midagsang sila sa Department of Budget and Management aron iduso ang paspas nga pagpagula sa pondo alang sa ilang mga benepisyo.

Gibatikos usab sa mga mamumuo sa panglawas ang pagtuboy kang Department of Health (DOH) Secretary Teodoro Herbosa. Matud nila, dili siya angayan mahimong kalihim sa DOH tungod kay siya kontra-mamumuo sa panglawas, usa ka Red-tagger, ug nagasuporta sa pribatisasyon sa mga pangpublikong ospital ug serbisyong panglawas.