Walay luna sa panaghisgot kalinaw ang diskurso, ni pagpadayag, ilabina pagdemanda alang sa pagsurender sa National Democratic Front of the Philippines (NDFP) o sa armadong rebolusyonaryong pakigbisog sa Pilipinas. Kini ang pamahayag ni Kaubang Luis G. Jalandoni, Senior Adviser sa Negotiating Panel sa NDFP, atubangan sa sunud-sunod nga pamahayag sa mga upisyal sa Gubyerno ng Republika ng Pilipinas (GRP) ug Armed Forces of the Philippines (AFP) nga naghulagway sa panaghisgot kalinaw isip negosasyon sa “pagpasurender.”

Gipirmahan niadtong Nobyembre 23 ang Oslo Joint Statement sa Norway nga nagdeklara sa plano sa GRP ug sa NDFP nga subling ipahigayon ang panaghisgot kalinaw.

Partikular nga gisaway ni Kaubang Juliet de Lima, interim chairperson sa NDFP Negotiating Panel, si Gilberto Teodoro Jr, kalihim sa Department of National Defense, sa iyang gisulti nga ang pagsurender sa NDFP ang basihan sa GRP sa pakig-uyon nga subling ablihan ang negosasyon. Matud niya, nalimtan ni Teodoro nga ang GRP ang unang miduul sa NDFP ug dili ang sukwahi.

Matud nilang Ka Luis ug Ka Julie, “ang panaghisgot kalinaw dili panaghisgot alang sa kapitulasyon.” Pagduso nila, ang negosasyon usa ka talagsaong higayon aron sa makatinguha og pamaagi nga kauyunan sa usag usa ug prinsipyado aron hingpit nga tubagon ang tinuod nga mga hinungdan sa armadong panagbangi.

Angayan kunong magpukos na lamang ang GRP sa mahinungdanong adyenda sa negosasyon nga nakabutang sa The Hague Joint Declaration. Nagpasabot kini sa paghisgot sa borador sa Comprehensive Agreement on Social and Economic Reforms (CASER), nga nagtin-aw sa mga sosyo-ekonomikanhong ugat sa gubat sibil.

Suporta sa NDFP

Anaa sa likod sa NDFP negotiating panel ang mga alyadong organisasyon niini sa pagduso sa batakan ug hinanaling mga pangayo sa katawhan alang sa reporma sa yuta ug nasudnong industriyalisasyon ug uban pang lakang alang sa katilingbanong hustisya ug nasudnong soberanya. Girepresentahan nila ang nasudnon ug demokratikong interes sa tagsa-tagsa nilang sektor.

Kalabot sa gipirmahang Oslo Joint Statement, nagpagula og pamahayag sa pagsuporta ang nasudnong liderato sa Makabayang Kilusan ng Bagong Kababaihan (Makibaka), Liga ng Agham para sa Bayan (LAB), Katipunan ng mga Gurong Makabayan (Kaguma), Lupon ng Manananggol para sa Bayan (Lumaban), Christians for National Liberation (CNL), ingonman ang Partido Komunista ng Pilipinas ug Bagong Hukbong Bayan.

Abli usab kining gidawat sa mga rehiyonal ug pubrinsyal nga balangay sa NDFP. Ginaduso karon sa mga rebolusyonaryong organisasyon ang pagtuon ug pagtuon-balik sa mga sinulat ug pamahayag ni Kaubang Jose Maria Sison, sa NDFP ug sa Partido nga adunay kalabutan sa panaghisgot kalinaw para hugpungon ug anihon ang suporta sa mas lapad nga masang Pilipino.

Unsa ang angayang hisgutan?

Angayang hisgutan ang kaylap nga kawad-on sa yutang maugmad sa masang mag-uuma sa kabanikanhan. Tungod kay usa ka gubat mag-uuma ang gubat sa katawhan, yaweng hisgutanan ang pag-asdang sa tinuud nga reporma sa yuta. Ginahugpong sa Pambansang Katipunan ng mga Magbubukid (PKM) ang kusog sa mag-uuma aron iasdang ang maong mga pakigbisog.

Walay nahiagum ang masang mag-uuma sa mga mini nga reporma sa yuta sa reaksyunaryong estado. Giila sa PKM-Laguna ang kaso sa konsentrasyon sa yuta sama sa 7,100 ektarya nga anaa sa kamot sa pamilyang Yulo, pinakadakung asyenda sa Laguna, nga nagalangkub sa Calamba, Cabuyao, Sta. Rosa, ug Biñan.

Matud sa PKM-Laguna, kaylap ang pagpalayas sa mga mag-uuma sa kayutaan sa mga Yulo nga ginabaligya sa mga dagkung burgesyang kumprador sama sa mga Ayala. Gipailalum sa kumbersyon ang mga irigadong yuta ngadto sa mga golf course, subdibisyon, industrial park, ug uban pang komersyal nga gamit, nga walay kapuslanan sa masang mag-uuma. “Unsaon namo pagtanum sa mga sementadong kalsada ug mga aspalto nga ginatukuran sa dagkung mga bilding? Gutom ang matagamtam namo kung magpadayon kini,” pamahayag sa PKM-Laguna.

Angayang hisgutan ang pagpaasdang sa nasudnong industriyalisasyon. Ang pagtukod niini makatabang sa pagpalambo sa ekonomiya. Gikinahanglan kini aron makamugna og mga trabaho, ipataas ang kita ug tubagon ang batakang mga panginahanglan sa katawhan.

Angayang hisgutan ang malukpanong kalisud, kawalay trabaho ug ubos nga suhulan sa masang mamumuo. Matud mismo sa estadistika sa estado, mikabat sa 2.3 milyong trabaho ang gikatahong nawala niadtong Setyembre. Dugang sa mga nawalang trabaho ang 358,000 nga gitangtang sa pwersa sa pamuo sa parehong panahon. Nagkadaghan usab ang ihap sa nagatrabaho sa impormal nga ekonomiya.

Padayong mius-us ang tinuod nga bili sa suhulan sa mga mamumuo. Sa NCR, ₱504 na lamang ang tinuod nga bili sa gakadawat nga minimum nga ₱610. Wala pa kini sa katunga sa ₱1,189 kada adlaw nga ang-ang sa makabuhi nga suhulan. Sa abereyds, 35.5% lamang sa makabuhi nga suhulan ang gakadawat sa mga mamumuo sa tibuok nasud.

Angayang hisgutan ang dayag nga pagpakaitoy sa rehimeng Marcos sa among imperyalistang US. Ginapasagdan niining guyuron sa US ang Pilipinas sa pag-ulbo sa inter-imperyalistang gyera batok sa China, ug ginapagamit ang tibuok nasud isip base ilalum sa Enhanced Defense Cooperation Agreement ug uban pang dili patas nga tratadong militar.

Angayan usab nga hisgutan ang pagpanalipud sa nasudnong soberanya sa Pilipinas batok sa interbensyon ug pagpangatake sa imperyalistag China sa West Philippine Sea.

Angayang hisgutan ang pagkab-ot og hustisya sa liboan ka biktima sa mga paglapas sa tawhanong katungod. Gikan Disyembre 1, 2022 hangtud Disyembre 1 karong tuiga, narekord sa Ang Bayan ang 957 ka kaso sa paglapas sa tawhanong katungod ug 127,386 biktima sa rehimeng US-Marcos. Walay puas sa pagligis sa mga komunidad sa kabanikanhan ang armadong pwersa niini, gamit ang kampanya sa aerial bombing, pagpanganyon ug pagpang-istraping.

Kini ug uban pang mga sosyo-ekonomikanhong hisgutanan ang pugos nga ginalikayan ug gustong tabunan sa rehimeng US-Marcos sa posibleng subling pag-abli sa negosasyon.