Reporma sa lupa, duso sa mga mag-uuma sa Bacolod City. Gipangunahan sa Kilusang Magbubukid ng Pilipinas (KMP)-Negros ug National Federation of Sugar Workers Negros (NFSW) ang duha ka adlaw nga aktibidad sa mga mag-uuma sa Bacolod City niadtong Enero 23-24 aron iduso ang ilang katungod sa yuta.

Niadtong Enero 23, nagpiket-dayalogo sila sa Provincial Agrarian Reform Office I sa syudad kalabot sa mga problema sa 37 ka asyenda sa Negros Island. Pagkaugma, nagmartsa sila sa sentro sa syudad para dumdumon ang ika-37 nga anibersaryo sa Mendiola Massacre ug batikuson ang ginaduso nga charter change sa rehimeng Marcos.

125 nga kasumaran sa gyerang Pilipino-Amerikano, gidumdum. Gidumdum sa mga grupong nasudnon-demokratiko pinaagi sa pagprotesta atubangan sa embahada sa US niadtong Pebrero 4 ang ika-125 nga anibersaryo sa pagsugod sa gubat Pilipino-Amerikano nga mipatay sa gatusan ka libong Pilipino. Gihatagag-duut sa mga grupo ang padayon nga pagpanakop sa US sa nasud, sa porma sa permanenteng presensyang militar niini sa Pilipinas. Gibatikos usab niini ang US sa mga imperyalistang gyera niini, ug pagpondo sa henosidyo sa Israel sa Palestine.

First-day Rage, gilunsad sa lain-laing kampus sa UP. Gisugat og protesta sa mga estudyante sa University of the Philippines (UP) ang unang adlaw sa klase sa lain kampus niini sa nasud. Gihatagag duut sa mga protesta ang isyu kalabot sa akademikong kahimtang, pagpanumpo sa kabatan-onan, pagsukol sa charter change ug uban pang isyung katilingbanong. Gilunsad sa mga estudyante ang protesta sa UP-Cebu niadtong Enero 23; sa UP-Manila, UP-Visayas ug UP-Tacloban niadtong Enero 29; sa UP-Los Baños niadtong Pebrero 5; ug sa UP-Diliman niadtong Pebrero 6.

Pagsaka sa matrikula sa DLSU, gibabagan. Kapin 100 ka estudyante sa De La Salle University (DLSU)-Manila ang nagprotesta sulod sa kampus niini sa Taft Avenue, Malate, Maynila niadtong Enero 31 para ipadayag ang ilang pagsupak sa planong pagsaka sa matrikula sa mosunod nga semestre. Nagmartsa usab ang mga estudyante sa kampus sa DLSU-Laguna sa maong adlaw. Parehong gipasiugdahan ang protesta sa mga konseho sa estudyante. Panawagan nilang magpatuman og “tuition freeze” atubangan sa hulgang 9.21% nga pagtaas sa matrikula.

Presyo sa lana, paubsan. Naglunsad og protesta ang mga drayber ug opereytor sa dyip atubangan sa Shell Gasoline Station sa Caretta, Cebu City niadtong Enero 30 aron kundenahon ang subling pagsaka sa presyo sa lana. Sunud-sunod sa milabayng semana ang nahimong pagsaka sa presyo sa lana.

Ato ang Pinas, China layas! Nagprotesta ang mga mangingisda ug progresibong grupo sa Chinese Consulate sa Makati City niadtong Pebrero 6 aron batikuson ang padayon nga interbensyon sa China sa West Philippine Sea. Gipangunahan ang protesta sa Pambansang Lakas ng Kilusang Mamamalakaya ng Pilipinas (Pamalakaya).