Natukmod sa hiniusang protesta sa mga tsuper ug opereytor, sa pagpangulo sa Pagkakaisa ng mga Samahan ng Tsuper ug Operator Nationwide (Piston), Samahang Manibela Mananakay ug Nagka-Isang Terminal ng Transportasyon (Manibela), ug Tanggol Pasada Network, ang rehimeng US-Marcos nga subling iatras ang dedlayn sa pugos nga konsolidasyon sa prangkisa sa mga public utility vehicle (PUV) niadtong katapusan sa Enero. Kabahin ang pugos nga konsolidasyon sa bogus nga PUV Modernization Program (PUVMP) sa gubyerno. Gisibog sa rehimen ang dedlayn ngadto sa Abril 30 gikan sa kanhing Disyembre 31, 2023 nga una nang napalungtad niadtong Enero 31.

Gianunsyo ang pagsibog sa dedlayn human ang ikaduhang pagdungog sa komite sa transportasyon sa Kongreso niadtong Enero 24, nga nagahisgot sa kainutilan ug kapalpakan sa PUVMP. Hangtud sa kasamtangan, dakung ihap pa sa mga drayber ug opereytor sa dyip ang nagbalibad nga magpakonsolida, sukwahi sa pamahayag sa rehimen. Daghan pang mga ruta ang walay mga konsolidadong prangkisa.

Ginaila sa mga grupo ang pag-atras sa dedlayn isip kadaugan sa ilang kolektibong protesta. Ingonman, padayon nilang ginapanghingusog nga ibasura ang tibuok iskema sa pugos nga konsolidasyon ug PUVMP. Matud nila, pagagamiton nila kining tuntungan alang sa mas daku pang protesta batok sa programa.

Gihisgutan usab sa ikatulong pagdungog niadtong Enero 31 ang isyu sa pugos nga konsolidasyon nga matud sa pipila ka mga magbabalaod maila nga dili konstitusyunal ug lapas sa katungod sa mga drayber ug opereytor. Samtang, nagprotesta usab ang duha ka grupo sa Korte Suprema sa Maynila niadtong Enero 23 aron ipanawagan ang pagpabor kanila sa korte kalabot sa ilang gipasakang petisyon aron ipahunong ang pugos nga konsolidasyon sa prangkisa ug ang PUVMP. Giatol nila ang protesta samtang anaa sa sesyon ang tanang mga mahistrado.