Naduso sang ululupod nga hublag sang mga drayber kag opereytor, sa pagpamuno sang Pagkakaisa ng mga Samahan ng Tsuper at Operator Nationwide (Piston), Samahang Manibela Mananakay at Nagka-Isang Terminal ng Transportasyon (Manibela), kag Tanggol Pasada Network, ang rehimen US-Marcos nga liwat i-atras ang dedlayn sang pilitay nga konsolidasyon sang prangkisa sang mga public utility vehicle (PUV) sadtong katapusan sang Enero. Kabahin ang pilitay nga konsolidasyon sang bogus nga PUV Modernization Program (PUVMP) sang gubyerno. Ginpaisol sang rehimen ang dedlayn padulong Abril 30 halin sa daan nga Disyembre 31, 2023 nga nauna na nga napalawig padulong Enero 31.

Gin-anunsyo ang pag-isol sang dedlayn matapos ang ikaduha nga paghukom sang komite sa transportasyon sa Kongreso sadtong Enero 24, nga nagtalakay sa kainutil kag kapalpak sang PUVMP. Tubtob subong, dako nga isip pa sang mga drayber kag opereytor sang dyip ang namalibad nga magpakonsolida, kabaliskaran sa pahayag sang rehimen. Madamo pa mga ruta ang wala mga konsolidado nga prangkisa.

Ginakabig sang mga grupo ang pag-atras sang dedlayn bilang kadalag-an sang ila ululupod nga paghulag. Amo pa man, padayon nila nga ginaduso nga ibasura ang bug-os nga iskema sang pilitay nga konsolidasyon kag PUVMP. Base sa ila, pagagamiton nila ini nga tungtungan para sa ilabi nga dalagkuan nga hublag batuk sa programa.

Gintalakay naman sa ikatatlo nga paghukom sadtong Enero 31 ang hambalanon sang pilitay nga konsolidasyon nga sandig sa ila nga mga mamalidha ang makabig nga indi konstitusyunal kag lapas sa kinamatarung sang mga drayber kag opereytor. Samtang, nagprotesta man ang duha ka grupo sa Korte Suprema sa Manila sadtong Enero 23 para ipanawagan ang pagdampig sa ila sang korte kaangot sang ila ginpasaka nga petisyon para ipa-untat ang pilitay nga konsolidasyon sang prangkisa kag ang PUVMP. Gindu-ngan nila ang protesta samtang yara sa sesyon ang tanan nga mga mahistrado.s