Dili moubos sa 35 ka elemento sa Central Armed Police Force (CAPF) ug espesyal nga yunit nga COBRA (Combat Battalion for Resolute Action) sa reaksyunaryong estado sa India ang napatay sa reyd sa People’s Liberation Guerilla Army (PLGA) sa kampo sa Darmavaram niadtong Enero 16. Ang Darmavaram usa ka komunidad sa Pamed, Bijapur sa rehiyon sa Chhattisgarh. Gawas dinhi, 40 pa ka pulis ang grabeng nasamdan sa pag-atake. Gilunsad sa PLGA ang reyd aron ig-on ang pasistang Operation Kagar sa Central India.

Sa taho, nagsugod ang reyd sa alas-7:05 sa gabii. Migamit ang PLGA sa kapin 600 ka granada ug uban pang kaugalingong hinimo nga mga eskplusibo sa tulo ka oras nga reyd. Ayha ang mismong pag-atake sa kampo, gikontrol na sa mga Pulang gerilya ang palibot nga mga lugar. Gibarikadahan nila ang yaweng mga dalan gamit ang dagkung troso ug gipalihok ang milisya aron pabuthan ang morespondeng mga yunit sa pulis. Namartir sa reyd ang tulo ka manggugubat.

Dunga niini, giatake niadtong Pebrero 1 sa PLGA ang konstruksyon sa usa ka tulay sa Abujhmaad, sa bandang distrito sa Narayanpur, Chhattisgarh. Giparalisa sa mga gerilya ang usa ka traktora, usa ka tanker ug concrete mixer. Ang pagtukod og tulay, sama sa uban pang “proyektong pangkalamboan” sa Abujhmaad, paghatag dalan sa pagsulod sa dagkung korporasyon nga mokawkaw sa natural nga bahandi sa lugar.

Matud sa Communist Party of India (CPI)-Maoist, ang maong opensiba kabahin sa ilang pagpanalipud sa katawhang Adivasi (katutubo). Matud niini, pahatag kini og hustisya sa pagpanumpo sa mga pulis sa rebolusyonaryong katawhan.

Terorismo sa Operation Kagar

Gisugdan sa pagpatuman ang Operation Kagar niadtong Enero sa Abujhmaad, usa ka bukiron ug lasangong rehiyon sa habagatan sa estado sa Chhattisgarh. Kabahin kini sa gipakaylap nga kontra-insurhensiyang kampanya nga Operation SAMADHAN-Prahar (OSP) sa reaksyunaryong estadong Indian nga gipangulohan ni Narendra Modi.

Ginapalihok ilalum sa operasyon ang 10,000 ka pwersang paramilitar nga nakadeploy sa lugar. Ang 3,000 dinhi gikan pa sa laing estado sa India nga gibubu sa Abujhmaad aron pokusan ang pagpukan sa armadong pagsukol nga gipangulohan sa CPI-Maoist. Nakapwesto ang pwersa sa estado sa unum ka kampong paramilitar sa lugar. Sa ingon, adunay tulo ka paramilitar sa kada pito ka lokal nga residente.

Usa sa linuog nga krimen sa mga pulis dinhi ang pagpatay sa usa 6-ka-bulang bata niadtong Enero 1 sa Bijapur. Gawas niini, nataho usab ang kaso sa pagdagit ug pagpatay sa tulo ka Adivasi sa Nendra, Bijapur niadtong Enero 19. Ang mga biktimang silang Madkam Soni, Punem Nangi, ug Karam Kosa padulong unta sa usa ka protesta dihang gidagit sa mga pulis sa bukirong bahin sa ilang komunidad. Samtang niadtong Enero 30, gipusil patay sa mga pulis si Ramesh Poyam, residente sa Bodga, Bastar, samtang paadto sa suba aron maligo.

Aron tabunan ang ilang mga krimen, gipagawas sa mga pwersa sa estado nga ang mga biktima napatay sa engkwentro sa PLGA o kaha nadamay sa engkwentro tali niini ug sa PLGA. Kining tanan gipanghimakak sa CPI-Maoist.

Nataho usab sa mga grupo sa tawhanong katungod sa India ang pipila ka mga kaso sa aerial bombing gamit ang mga drone sa habagatan sa Chhattisgarh niadtong Enero 13. Kanhi nang biktima ang maong mga komunidad sa subli-subli nga pagpamomba sukad pa niadtong 2022. Nagbunga kini og grabeng kahadlok sa mga Adivasi ug dili na sila makatrabahong malinawon.

Giduyugan ang militarisasyon sa Central India sa korporatisasyon ug pagsulod sa dagkung mga kumpanya sa bahandianong lasang sa India. Sa takuban sa pagbatok sa mga Maoista, nagsilbi ang maong mga operasyon sa pagpagrabe sa pagpangawkaw sa mga langyawng dagkung korporasyon sa kinaiyanhong bahandi sa nasud.

Naglaway ang reaksyunaryong estado ug mga kakundabo niining korporasyon ug imperyalistang mga nasud nga sudlon ang Abujhmaad tungod kay maila kini nga usa sa pinakaulahing lugar sa India nga wala pa nakawkaw ug nagpabiling protektado ang kalasangan.

Ang PLGA ug CPI-Maoist ang bugtong katimbayayong sa mga Adivasi sa Abujhmaad sa ilang kinabuhi ug kamatayong pakigbisog alang sa kinaiyahan, sa ilang yuta ug panginabuhian.