Pagpanangtang sa SkyCable, gisuklan. Ginasuklan sa mga unyon sa superbisor ug empleyado sa SkyCable ang nakatakdang pagpanangtang sa 80 ka mamumuo sa SkyCable Corporation sa umalabot nga Pebrero 26 human mapinal ang pagbaligya sa kumpanya sa PLDT. Pagatangtangon ang mga mamumuo tungod kuno sa “redundancy.”

Negosasyon sa CBA sa Nexperia. Misulod na sa bag-ong negosasyon alang sa Collective Bargaining Agreement (CBA) para sa 2024 hangtud 2026 ang Nexperia Phils. Inc. Workers Union ug hedkwarters sa Nexperia Philippines. Ginaduso sa unyon ang makatarunganong dugang-suhulan, mga benepisyo ug uban pang ekonomikong katungod sa mga mamumuo. Ulahi silang nakignegosasyon niadtong 2020.

5 ka adlaw nga piket sa mga empleyado sa BACIWA. Miadto sa Maynila ang gitangtang nga mga empleyado sa Bacolod City Water District (BACIWA) aron magpiket-protesta sa nasudnong upisina sa Civil Service Commission sa Quezon City gikan Enero 29 hangtud Pebrero 2. Duso nilang ibasura ang joint venture agreement tali sa Prime Water sa mga Villar ug BACIWA nga hinungdan sa pagkawala sa ilang trabaho ug pagpailalum sa serbisyo sa BACIWA sa kontrol sa pribadong korporasyon.

Separation pay, duso sa mga mamumuo sa Bataan. Subling gipanawagan sa mga mamumuo sa kumpanyang Chun Chiang Enterprises Manufacturing Incorporated nga ihatag na kanila ang ilang separation pay. Hilabihan na kining natanggong sukad nga nagsara ang kumpanya tungod kuno sa pagkalugi niadtong 2022 atol sa pandemya. Nagaprodyus ang kumpanya og panglalaking mga pantalon.

Mga mamumuo sa Laguna, nagkaraban. Nagpiket-protesta ang mga mamumuo sa Laguna sa upat ka ahensya sa pamuo sa gubyerno sa prubinsya niadtong Pebrero 5. Girehistro ang ilang panawagan alang sa mahinungdanong dugang suhulan, seguridad sa trabaho, ug katungod sa pag-unyon. Pagpangandam daw usab kini sa ikasang malukpanong protesta sa Adlaw sa Pamuo sa Mayo 1.