Walay kaluoy nga gipatay sa mga ginsakpan sa 2nd IB ang magtiayong senior citizen nga silang Pedro Regala, 78 anyos, ug Florencia Regala, 67 anyos sa Barangay Toboran, Cawayan, Masbate niadtong Pebrero 5, 2024. Gidagit ang mga biktima sa ilang balay, gidala sa suuk nga bahin sa sapa, walay kaluoy nga girakrakan, gibutangan og ammo pouch ug gipagawas nga napatay sa engkwentro

Gibalandra sa lapukan ang patayng lawas sa mga tigulang ug giparada sa social media nga mga “terorista” aron tabunan ang ilang linuog nga krimen. Nalambigit sa pagpatay ang yunit sa 2nd IB ug grupong paramilitar sa pagpangulo ni Adriel Besana. Ang Barangay sa Tuboran ay gipugaran sa ALSA MASA nga gigamit sa militar aron magsabwag og terorismo sa Masbate. Nataho pa nga lulong sa droga ang mga mipatay sa magtiayon.

Pag-aresto. Trese ka sibilyan ang giaresto sa mga pwersa sa estado sa lain-laing kaso sa Cebu, Negros, Quezon ug Masbate sa milabayng duha ka semana.

Giaresto sa mga pwersa sa estado ang lider mag-uuma nga si Allan Flores niadtong Enero 21 sa iyang umahan sa Sibagay 2, Barangay Cantabaco, Minglanilla, Cebu. Gipasakaan siya og mga kasong pagpatay ug sulayng pagpatay sa Bohol.

Sa parehong adlaw, tulo ka mag-uuma nga sakop sa Kauswagan sang mga Mangunguma sa Buenvista (KMB) ang giaresto sa 94th IB sa Sityo Cantupa-Pisok, Barangay Buenavista, Himamaylan City, Negros Occidental. Naila ang mag-uuma nga mao silang Deloy de Leon, Vincies de Leon ug Remy Villacanao. Niadtong Enero 22, gilutaw sa militar si Vincies de Leon ug gipasakan og kasong pakyas nga pagpatay. Wala pa gipakita ang duha pa hangtud karon.

Sa Mulanay, Quezon, arbitraryong giaresto sa pulis ang direktor sa pelikula ug propesor nga si Jade Castro ug tulo niyang higala niadtong Pebrero 2. Ginalambigit sila sa pagsunog sa usa ka e-jeep sa Catanauan niadtong Enero 31. Si Castro nagahimo og progresibong pelikula ug lakip sa mibarog batok sa jeepney phaseout.

Niadtong Enero, giaresto sa mga pwersa sa estado ang lima ka sibilyan sa Masbate na giakusahang mga Pulang manggugubat nga nakaengkwentro sa 2nd IB sa Barangay Balantay, Dimasalang niadtong Hunyo 16, 2023. Ang lima mao silang Jamara Tumangan, Rowel Hagnaya, Alden Tumangan, Rico Cuyos ug Senen Dollete. Sa aktwal, biktima sila sa pagpamusil sa mga sundalo, nga gikamatay sa usa ka menor-de-edad.

Militarisasyon. Niadtong Enero 30, gipabuthan sa 96th IB ang mga residenteng nangahas nga mangopra sa kalubihan nga giilog sa militar sa Barangay San Jose, Uson ug Barangay Sawmill, Mobo, Masbate. Niadtong Enero 29, nataho ang mga kaso sa pagpangawat ug iligal nga pagransak sa mga CAFGU ug militar sa Hacienda Mortuegue sa lungsod sa Pio V. Corpuz ug Esperanza.