Duha na ka eksperto sa United Nations (UN) ang nagrekomenda sa pagbungkag sa National Task Force-Elcac tungod sa kadaut nga gibunga niini sa mga katungod sa katawhang Pilipino. Niadtong Pebrero 2, girekomenda kini ni Irene Khan, UN Special Rapporteur alang sa gawasnong pagpamahayag ug opinyon, human ang iyang 10 ka adlaw nga imbestigasyon sa Pilipinas.

Ayha siya, girekomenda na usab ni Ian Fry, UN Special Rapporteur alang sa pagpasiugda ug pagpanalipud sa tawhanong katungod sa konteksto sa climate change ug ang pagbungkag sa ahensya niadtong Nobyembre 2023. Sama ni Khan, nakigtigum si Fry sa lain-laing demokratikong sektor sa nasud.

Sa bahin ni Khan, gihatagan niya og duut ang mga gawi nga nakaapekto sa gawasnong pagpamahayag sama sa Red-tagging, harasment ug pagpamig-ot gamit ang ligal nga mga balaod. Sa iyang pamahayag, girekomenda niya ang pagbungkag sa NTF-Elcac nga matud niya “daan na” ug “tigpasiugda” sa Red-tagging. Girekomenda usab ni Khan ang pag-“unblock” o pagtangtang sa restriksyon sa mga progresibong website nga gipahamtang sa reaksyunaryong estado.

Ang maong mga rekomendasyon naggikan sa pakigdayalogo ni Khan sa lain-laing grupo sa midya ug uban pang demokratikong sektor, ug bisan sa mga upisyal ug armadong pwersa sa estado. Gibisita usab niya sa prisohan sa Tacloban City ang nakabilanggong si Frenchie May Cumpio sa independyenteng midya nga Eastern Vista ug duha pa niyang kauban.

Gawas sa Maynila ug Tacloban, miadto si Khan sa mga syudad sa Baguio, Cebu, ug Davao. Gisugat siya dinhi sa mga demokratikong organisasyon. Naglunsad sila og mga piket ug mga diskusyon kalabot sa pagbisita ni Khan sa Pilipinas.

Gisuportahan sa mga grupo sa midya, artista ug tigpanalipud sa tawhanong katungod ang mga rekomendasyon ni Khan. Gikalipay usab nila ang pusisyon ni Khan sa Cybercrime Prevention Act nga matud niya nagapig-ot sa kagawasan sa pagpamahayag, ilabina ang mga probisyon niini sa cyberlibel.