Duha ka eksperto na sang United Nations (UN) ang nagrekomendar sang pagbungkag sang National Task Force-Elcac tungod sa kahalitan nga gintuga sini sa mga kinamatarung sang pumuluyong Pilipino. Sadtong Pebrero 2, ginrekomendar ini ni Irene Khan, UN Special Rapporteur para sa hilway nga pagpamahayag kag opinyon, matapos ang iya 10 ka adlaw nga imbestigasyon sa Pilipinas.

Bag-o siya, ginrekomendar man ni Ian Fry, UN Special Rapporteur para sa pagtib-ong kag pagpangapin sang tawhanon nga kinamatarung sa konteksto sang climate change kag ang pagbungkag sa ahensya sadtong Nobyembre 2023. Pareho ni Khan, nakigsinapol si Fry sa nagkalain-lain nga demokratiko nga sektor sa pungsod.

Sa bahin ni Khan, ginhatagan ya pagtamod ang mga gawi nga nakaapekto sa hilway nga pagpamahayag pareho sang Red-tagging, harasment kag pagpang-ipit gamit ang mga laye. Sa iya nga pahayag, ginrekomendar niya ang pagbungkag sa NTF-Elcac nga sa iya “daan na” kag “tigduso” sang Red-tagging. Ginrekomendar man ni Khan ang pag-“unblock” ukon pagkakas sa restriksyon sa mga progresibo nga website nga ginpapanaog sang reaksyunaryo nga estado.

Ang mga rekomendasyon nga ini ang halin sa pagpakigdayalogo ni Khan sa nagkalain-lain nga grupo sang midya kag iban pa nga demokratiko nga sektor, kag bisan sa mga upisyal kag armado nga pwersa sang estado. Ginbisita man niya sa bilangguan sa Tacloban City ang napriso nga tigpamahayag nga si Frenchie Mae Cumpio sang independyente nga midya nga Eastern Vista kag duha pa niya ka upod.

Magluwas sa Manila kag Tacloban, nagkadto si Khan sa mga syudad sang Baguio, Cebu, kag Davao. Ginsugata siya diri sang mga demokratiko nga organisasyon. Naglunsar sila sang mga piket kag mga talakayan kaangot sa pag-abot ni Khan sa Pilipinas.

Gin-uyunan sang mga grupo sang tigpamahayag, artista kag tigpangapin sang tawhanon nga kinamatarung ang mga rekomendasyon ni Khan. Ginkalipay man nila ang pusisyon ni Khan sa Cybercrime Prevention Act nga kuno nagapugong sa kahilwayan sa pagpamahayag, ilabi na ang mga probisyon sini sa cyberlibel.