Liwat nga naglupok sadtong Agosto ang protesta sang pumuluyo nga Indonesian batuk sa mga kontra-pumuluyo nga patakaran sang presidente sang pungsod nga si Prabowo Subianto kag bise presidente niya nga si Gibran Rakabuming Raka. Nagsingki ang ila kaakig pagkatapos nga ginbunggoan sang salakyan sang pulis kag napatay si Affan Kurniawan, isa ka delivery rider, sadtong Agosto 28. Halin sa kabisera sa Jakarta, naglapnag ang mga protesta sa 32 ka probinsya kag sa mga syudad sang Bandung, Surabaya, Malang, Solo, Yogyakarta, Medan, kag Makassar.

Sa ulihi nga mga protesta, ginpakita sang pumuluyo ang kasingki sang ila kaakig sa pagsunog sang pangpubliko nga bilding, pasilidad kag salakyan, kag paglusob sa mga balay sang kurakot nga opisyal kag pulitiko. Ginsumpo sang rehimen Prabowo-Gibran ang mga protesta gamit ang tear gas, water cannon kag rubber bullet. Ginpaidalum sang rehimen sa mala-layi militar ang mga kadalanan kag komunidad kag ginmanduan ang pulis nga mang-aresto kag maniro sang mga raliyista.

Naglab-ot sa 10 ang ginpatay sang mga pwersa sang estado halin Agosto 25 tubtob Septyembre 2, samtang 1,241 ang gin-inaresto (lakip ang mga gindeklarar nga mga nadula) kag 800 ang malubha nga napilasan.

Mitsa sang mga protesta ang pagkangil-ad sa paghatag sang rehimen sang bulanan nga alawans para sa pabalay sang mga myembro sang parlyamento, nga 20 ka beses nga mas dako sang sa minimum nga sweldo sang mga mamumugon. Wala pa labot diri ang ila sweldo nga yara sa 100 milyon rupiah ukon ₱350,000/bulan. Kadungan sini, ginbuhinan ni Prabowo ang badyet para sa mga rehiyon, nga nagtulod sa mga lokal nga gobyerno nga magpatuman sang dugang nga buwis nga tubtob 250%.

Tuman nga ginakangil-aran sang mga Indonesian ang rehimen, sa pihak sang kuno “popularidad” sini sang mapili sa pwesto. Sa una nga tuig sa poder, ginasakuan ni Prabowo ang pagpahabok sa iya gabinete kag mga opisyal sa parlyamento. Ginpalapad niya ang gahum sang militar kag pulis agud konsolidahon ang iya kontrol sa estado. Gin-atupag niya ang pagkonsolida sang kurakot kag benepisyo paagi sa pagtukod sang BPI Danantara (National Sovereign Wealth Fund).

Madugay na nga nagabukal ang kaakig sang mga Indonesian sa pagka-inutil sang estado nga sabton ang krisis sa palangabuhian kag ekonomiya. Nagasinaka ang presyo sang mga balaklon kag serbisyo, gasto sa edukasyon kag ikaayong lawas. Madamo ang wala sang trabaho kag lapnagon ang kawad-on sang kasegurohan sa trabaho. Tuman ka indi bastante para sa kinahanglanon sang isa ka pamilya ang minimum nga sweldo.

Sa guwa sang pungsodnon nga kabisera, naga-grabe ang paghimulos sa pamugon, pagpang-agaw sang duta sang mga dumuluong nga korporasyon, lapnagon nga pagpalayas sa mga mangunguma kag tumandok, pagkaguba sang kapalibutan kag kriminalisasyon sa pagpamatuk sa engrande nga mga proyektong imprakstrukta, mina kag plantasyon nga ginsugdan sang nauna nga rehimen Widodo kag ginpadayon ni Prabowo.

Sa banwa sang Pati sa Central Java, nagprotesta sadtong una nga semana sang Agosto ang 100,000 ka tawo para sikwayon ang dugang-buwis nga ini kag igiit ang pagpalayas sang rehente (alkalde) sa poder kag pagbasura sa iban pa niya nga kontra-pumuluyo nga patakaran. Sadtong Hulyo, nagprotesta man ang mga magagmay nga negosyante, mga mamumugon kag imol nga ginpalayas para hatagan-ligwa ang 1,175-ektaryang Mandalika Special Economic Zone, isa ka proyektong megaturismo. Sini man nga bulan, nagwelga ang mga mamumugon sang PT Huadi Nickel Alloy Indonesia batuk sa lapnagon nga kakasanay kag pwersa nga pag-kanselar sang trabaho nga wala sang negosasyon.

Nag-ani sang suporta ang mga protesta sa Indonesia halin sa pumuluyo sa mga kaiping-pungsod sini sa Asia nga nagaantus sang kaangay nga krisis sa palangabuhian kag nagaatubang sang kaangay nga pagpangsumpo kag pasismo.

Nagpaabot man sang pakig-isa ang Partido Komunista ng Pilipinas sa mga protesta nga siling sini nagapatingkad sang grabe nga kagustuhan sang pumuluyo nga Indonesian para sa rebolusyonaryo nga pagbag-o. Kaupod ang masang anakbalhas nga Indonesian, ginapas-an sang mga Pilipinong anakbalhas ang kabug-aton sang indi patas nga sistema sa ekonomiya, nga ginpalala sang pangkalibutanon nga krisis sang kapitalismo, samtang padayon nga nagapagusa ang mga reaksyonaryong sahi kag pulitiko.

Matambok ang kondisyon sa Indonesia para sa masingki nga makasahi nga paghimakas, indi lang paagi sa mga masang protesta, kundi labaw nga malahalon, paagi sa armadong pakig-away kag inaway banwa, suno sa PKP.