Determinado ang Partido, Bagong Hukbong Bayan kag bug-os nga rebolusyonaryonga kahublagan sa Negros nga pabakuron ang baseng masa sa sakop sini. Ginhatag nila ang ila bug-os nga kusog, kaisog kag wala pagpangduha-duha sa pagtuman sang hilikuton masa sa ubay sang kahublagan panadlong sa atubang sang wala-puas nga operasyon militar sa larangan gerilya.

Sa halos bug-os nga bulan sang Agosto, ginpasingki kag ginpalapad sang AFP kag SAF-PNP ang operasyon militar sa kabukiran sang isa ka larangan sa Negros. Ginpakat diri ang masobra 600-700 ka pwersa sa 32 kolum (9-12 nga elemento) sang pasistang tropa halin sa lima ka batalyon sang militar kag isa ka batalyon sang pulis. Nagahulat man ang mga elemento sang CAFGU sa mga detatsment kag patrol base kon may mahitabo nga engkwentro sa tunga sang militar kag mga yunit sang BHB.

Tuyo sang madamol nga presensya sang kaaway nga lagson ang baseng masa, kubkubon kag dugmukon ang mga yunit sang hukbo sang banwa kag bug-os nga rebolusyonaryong kahublagan sa sakop sang larangan gerilya.

Gamit sang AFP kag PNP ang mga nagsungka nga mga traidor sa masa kag rebolusyon. Nagserbe sila nga mga giya para suyoron ang lugar, magwas-ag sang kahadlok kag pwersa nga pagpasurender sa mga sibilyan. Naga-upod sila sa mga soldado sa pagpanilag, pagkuha sang litrato sa mga balay kag indibidwal nga ginadudahan nila nga mga nagasuporta sa BHB sa tabon sang mga kuno sensus. Samtang nagatiyog ang mga ahente kag soldado sa mga komunidad, may mga soldado nga nakapakat sa magta-as nga estratehikong tereyn. Nagaserbe sila nga blocking force sa mga alagyan sa tunga kag alagyan padulong sa katambi nga baryo.

Pagpabakod sang baseng masa

Sa tunga sini, liwat gintukod ang mga lubos nga asosasyon masa sa Marcia, isa sa mga baryo nga sakop sang bug-os nga operasyon militar. Mayoriya sa mga residente diri halin sa sandigan nga sahi. Kadam-an sa ila mga agsador sang agalon mayduta nga wala naga-estar sa barangay.

Mabudlay ang pangabuhi sang mga mangunguma sa Marcia. Biktima sila sang pyudal kag mala-pyudal nga paghimulos. Tersyahan ang partihanay sa ila produkto. Sa mga ginaswelduhan, ₱300 ang adlaw kag ₱500 naman sa pakyaw nga sistema sang trabaho. Mas matingkad diri ang pakyaw nga pamaagi sa pagtrabaho sang sa adlawan. Mara madugangan ang kita, nagasagod sang mga sapat para mabaligya sang mga mangunguma.

Malapit sa baryo ang mga detatsment sang CAFGU kag patrol base sang AFP. Sa nagligad nga mga tuig, nakaagum sang grabe nga militarisasyon ang baryo kon diin makasiligni ang mga abuso militar kag krimen sa inaway sang mga soldado.

Sa atubang sini, hugot nga naghiliusa ang mga residente sa Marcia para lampuwasan ang gina-atubang nila nga problema kag problema sa ekonomiya, pulitika, kultura kag militar. Ginatos ka pamilya, nga may masobra 2,000 ka indibidwal, ang nagpatapo sa mga tsapter sang Pambansang Katipunan ng mga Magbubukid (PKM), Makibaka kag Kabataang Makabayan (KM). Halos isa ka platun sang milisyang bayan ang napahulag sa depensa, mga tim sang yunit pangdepensa sa baryo sa kada sityo kag may sanga sang Partido sa lokalidad nga nagapamuno sa baryo.

Pagtukod sang tsapter

Ginhiwat sang san-o lang ang asembleya para liwat itukod ang tsapter sang PKM sa baryo. Ginbuksan ang aktibidad sa oryentasyon sa seguridad. Gindayaw sang kumander sang hukbo ang kaisog sang masa nga nagduso nga ipadayon ang pulong masa sa pihak sang tatlo ka kilometro lang halin sa ila pwesto ang naga-operasyon nga militar.

Sa pulong masa, sistematiko nila nga gintalakay, sa pagpanguna sang instruktor sa pulitika sang hukbo, ang nakahanda nga dokumento sang pagsuma sa paghulag sa lugar, kasaysayan, ulihi nga resulta sang sosyal nga imbestigasyon, suhetibong sitwasyon, istruktura kag katungdanan, 1-tuig nga Programa kag mga patakaran sang rebolusyonaryong organisasyon masa sa baryo. Gindun-an nila ang rebolusyonaryong kasaysayan sang baryo. Matingkad ang talakayan sa pagbuligay sang bug-os nga kahublagan halin pa dekada 1960 sa panahon sang KM, dekada 1970 sa panahon sang layi militar ni Marcos Sr, kag pag-abot kag paghulag sang hukbo sang banwa sa baryo tubtob sa subong.

Antes ang aktibidad, ginpatigayon ang serye sang mga pulong-konsultasyon sang Partido,yunit sang BHB kag responsable nga lider masa sa baryo. Nagpatigayon sang kumprehensibo nga plano base sa pangkabug-osan nga plano sang komite sa larangan kag seksyon komite kag sa aktwal nga hulag sang kaaway. Sa sulod sang isa ka semana, nalista ang mga hilikuton kag mga rekisito sa pagpatuman sang plano kasubong sang pagsuma, imbestigasyon kag paghimo sang plano. Ginpatigayon ang pauna nga pulong agud talakayon ang mga borador kag tun-an ang ginhanda nga mga dokumento. Ginhimo nga kampanya ang paghugpong sang bug-os nga organisadong masa sa mga dokumento nga ini kadungan sa kampanya sa pagtuon sang Rebolusyon. Ginhimo man nga kampanya ang pagbalik-tuon sa rebolusyonaryong giya sa repormang agraryo, nga isa sa sandigan nga dokumento sang PKP.

Ikaduha nga bahin: Kahublagan panadlong kag ang pagtukod sang asosasyon masa.