Grabeng gipanghinambog ni Ferdinand Marcos Jr nga ang krisis sa klima ang usa sa nag-unang tinutugunan sa iyang rehimen. Sa pagpakaaro-ingnong siya para sa kinaiyahan, bisan usang mini nga proyektong reporestasyon na lang ang gipatuman sa rehimen ilalum sa Department of Environment and Natural Resources (DENR). Lakip sa maong mga proyekto ang Expanded National Greening Program, “PagbaBAGo: A Million Learners and Trees”, Green Samar Reforestation Project, ug ang “Forests for Life: 5M Trees by 2028” nga gilunsad niadtong Marso 21. Ang tinuod nga laraw sa mga proyektong reporestasyon mao ang ablihan ang nahabiling lasang ug prontera alang sa “ligal” nga pagsulod sa mga dagkung langyawng negosyo aron kawkawon ug himuong plantasyon ang lapad nga kalasangan.

Malukpanong ginaguba ang lasang aron iandam ang kayutaan sa plantasyon sa mga kahoy. Sagad nga ginatanum sa mga plantasyon ug reporestasyon mga falcata ug kawayan tungod kay paspas kining motubo. Bisan og ang falcata ug kawayan natural nga makita sa Pilipinas, ang pagtanum niini sa dili natural nga ginatubuan magbunga og pagkadaut sa wildlife (kalasanon) ug ekolohiya sa usa ka lugar. Daghang tanum, mananap ug insekto ang napalayas ug nangamatay tungod sa pagtukod og mga plantasyon. Nagkahuyang usab ang kalidad sa yuta, hinungdan sa daling pagdahili niini. Nangahubas ang mga tubud ug suba, ug tungod kay dinaghan ug “langyaw” ang kahoy nga ginatanum, ginailugan niini og mineral ang laing mga tanum ug kahoy sa lugar.

Paglapad sa plantasyon sa mga kahoy

Niadtong 2021, ginawhag sa DENR ang pagtukod og plantasyon sa kawayan aron palambuon ang industriya niini sa nasud. Gihatagan sa Southern Philippines Development Authority ang EcoPlanet Bamboo, usa ka kumpanyang Amerikano, sa inisyal nga 8,369 ektarya aron tamnan og mga kawayan nga pang-eksport sa Lanao del Sur. Anaa sa 30,000 ektarya ang plantasyon sa kawayan sa Pangasinan sa kumpanyang CS First Green-Agri-Industrial Corp. Plano usab nga palapdon sa kumpanyang Kilambay Plantation Corp. ang ilang plantasyon hangtud 25,000 ektarya sa Mindanao, samtang kini aduna nay 3,000 ektaryang plantasyon sa Carmen, Cotabato. Target usab sa Department of Agriculture nga mapalapad hangtud 42,000 ektarya ang mga plantasyon sa kawayan sa tuig 2030.

Ang falcata usab ang pinakadaghang ginaeksport nga kahoy sa nasud, mayorya sa China, Japan ug US. Nag-una kining ginagamit sa paghimo og papel, plywood, pulpwood, veneer ug mga muwebles. Paborable alang sa mga eksporter ang falcata tungod kay paspas kining motubo. Pwede na kining anihon paglabay sa 3-10 ka tuig, depende sa gustong kalidad sa kahoy. Pinakadakung plantasyon niini makita sa Davao Oriental nga 1,200 ektarya ang gilapdon. Pinakadaghang plantasyon usab makita sa CARAGA nga anaa sa kinatibuk-ang 20,404 ektarya. Niadtong Hulyo, gianunsyo ang planong pagtinabangay sa Misamis University ug DENR alang sa pagtukod og tulo ka ektaryang plantasyon sa falcata sa Barangay Capucao, Ozamis City. Sa plantasyon, planong magtanum og 2,400 nga taas nga kalidad sa falcata ug magpadaghan og binhi niini para sa mga umahan ug plantasyon sa Region 10 ug sa uban pang prubinsya sa Mindanao. Nagkantidad og kapin ₱12,000 ang anaa sa 10 anyos nga kahoy sa falcata.

Sa takuban sa “reporestasyon,” ginalingla sa rehimeng US-Marcos ang katawhan nga ang mga plantasyong komersyal sama sa kawayan makikinaiyahan ug tubag sa krisis sa klima sa nasud. Apan ang mismong paglatag sa plantasyon, imbes nga buhion ug palambuon ang natural nga ekolohiya sa lasang, mao na hinuoy miguba sa kinaiyahan. Dakung ganansya ug dili pag-alima sa kinaiyahan ang tinuod nga laraw sa maong mga plantasyon sa kahoy.

Gamit ni Marcos ang pwersang militar ug pulis aron magsilbing gwardya ug tigpanalipud sa mga kapitalista. Daghang lumad ug mag-uuma na ang gipalayas, giilugan og yuta, gipig-ot, gidahit, gipasakahan og gama-gamang kaso, ug gipatay sa mga berdugo alang-alang sa interes ug dakung ganansya sa mga kapitalista.