Subling miulbo niadtong Agosto ang protesta sa katawhang Indonesian batok sa mga kontra-katawhang palisiya sa presidente sa nasud nga si Prabowo Subianto ug bise presidente niyang si Gibran Rakabuming Raka. Mikusog ang ilang kasuko human giligsan sa sakyanan sa pulis ug napatay si Affan Kurniawan, usa ka delivery rider, niadtong Agosto 28. Gikan sa sentro sa Jakarta, mikaylap ang mga protesta sa 32 ka prubinsya ug sa mga syudad sa Bandung, Surabaya, Malang, Solo, Yogyakarta, Medan, ug Makassar.

Sa ulahing mga protesta, gipakita sa katawhan ang ilang grabeng kasilag sa pagsunog sa pangpublikong mga bilding, pasilidad ug sakyanan, ug pagsulong sa mga balay sa kurakot nga upisyal ug pulitiko. Gisumpo sa rehimeng Prabowo-Gibran ang mga protesta gamit ang tear gas, water cannon ug rubber bullet. Gipailalum sa rehimen sa daw balaod militar ang mga kalsada ug komunidad ug gimanduan ang pulis nga mang-aresto ug mamusil og mga raliyista.

Mikabat sa 10 ka ang gipatay sa mga pwersa sa estado gikan Agosto 25 hangtud Setyembre 2, samtang 1,241 ang giaresto (lakip ang mga gideklarang nangawala) ug 800 ang grabeng nasamdan.

Talandaan sa mga protesta ang kasilag sa paghatag sa rehimen og binulang alawans para sa pabalay sa mga myembro sa parlamento, nga 20 beses nga mas daku kaysa sa minimum nga suhulang sa mga mamumuo. Wala pay labot dinhi ang ilang sweldo nga anaa sa 100 milyong rupiah o ₱350,000/bulan. Dungan niini, gikibhangan ni Prabowo ang badyet alang sa mga rehiyon, nga nagtukmod sa mga lokal nga gubyerno nga magpahamtang og dugang buwis nga hangtud 250%.

Hingpit nga gikasilagan sa mga Indonesian ang rehimen, taliwala sa kunuhay “popularidad” niini dihang mapili sa pwesto. Sa unang tuig sa poder, nagkapuliki si Prabowo sa pagburot sa iyang gabinete ug mga upisyal sa parlamento. Gipalapad niya ang gahum sa militar ug pulis aron konsolidahon ang iyang kontrol sa estado. Gipukusan niya ang pagkonsolida sa kurakot ug benepisyo pinaagi sa pagtukod sa BPI Danantara (National Sovereign Wealth Fund).

Dugay nang nagbukal ang kasilag sa mga Indonesian sa kainutilan sa estado nga sulbaron ang krisis sa panginabuhian ug ekonomiya. Dungan-dungan nga nagmahal ang presyo sa mga palaliton ug serbisyo, gasto sa edukasyon ug panglawas. Daghan ang walay trabaho ug kaylap ang kawalay kasiguruhan sa trabaho. Layong dili sarang sa panginahanglan sa usa ka pamilya ang minimum nga suhulan.

Gawas sa nasudnong sentro, grabe ang pagpahimulos sa pamuo, pagpangilog og yuta sa mga langyawng korporasyon, malukpanong pagpalayas sa mga mag-uuma ug lumad, pagkaguba sa kinaiyahan ug kriminalisasyon sa pagbabag sa engrandeng mga proyektong imprastruktura, mina ug plantasyon nga gisugdan sa unang rehimeng Widodo ug gipadayon ni Prabowo.

Sa lungsod sa Pati sa Central Java, nagprotesta niadtong unang semana sa Agosto ang 100,000 katawo aron isalikway ang maong dugang-buhis ug iduso ang pagpalagpot sa rehente (alkalde) sa poder ug pagbasura sa uban pa niyang kontra-katawhang palisiya. Niadtong Hulyo, nagprotesta usab ang gagmay nga negosyante, mga mamumuo ug kabus nga gipalayas aron hatagag dalan ang 1,175-ektaryang Mandalika Special Economic Zone, usa ka proyektong megaturismo. Niadtong bulana usab, nagwelga ang mga mamumuo sa PT Huadi Nickel Alloy Indonesia batok sa malukpanong pagpanangtang ug pugos nga pagpasuspende sa trabaho nga walay negosasyon.

Miani og suporta ang mga protesta sa Indonesia gikan sa katawhan sa mga silingang nasud niini sa Asia nga nagsagubang usab sa susamang krisis sa panginabuhian ug nag-atubang sa susamang pagpanumpo ug pasismo.

Nagpaabot usab og pakighiusa ang Partido Komunista ng Pilipinas sa mga protesta nga matud niini nagpakita sa kusog nga tinguha sa katawhang Indonesian alang sa rebolusyonaryong kausaban. Uban ang masang anakpawis sa Indonesia, ginaabaga usab sa mga Pilipinong anakpawis ang kabug-at sa dili patas nga sistema sa ekonomiya, nga gipagrabe sa kalibutanong krisis sa kapitalismo, samtang padayon nga nagpakatagbaw ang mga reaksyunaryong hut-ong ug pulitiko.

Tabunok ang kundisyon sa Indonesia alang sa kusog nga makihut-ong pakigbisog, dili lamang pinaagi sa mga masang protesta, apan labaw nga mahinungdanon, pinaagi sa armadong pagsukol ug gubat sa katawhan, matud sa PKP.