Determinado ang Partido, Bagong Hukbong Bayan ug tibuok rebolusyonaryong kalihukan sa Negros nga pakusgon ang baseng masa sa langkub niini. Gihatag nila ang tibuok kusog, determinasyon ug walay pagduhaduha nga pagpatuman sa gimbuhatong masa sa giya sa kalihukang pagtul-id atubangan sa walay hunong nga operasyong militar sa natarang gerilya.

Sa halos tibuok bulan sa Agosto, gipagrabe ug gipalapad sa AFP ug SAF-PNP ang operasyong militar sa kabukiran sa usa ka nataran sa Negros. Gideploy dinhi ang kapin 600-700 ka pwersa sa 32 ka kolum (9-12 nga elemento) sa pasistang tropa gikan sa lima ka batalyon sa militar ug usa ka batalyon sa pulis. Nakaistambay usab ang mga elemento sa CAFGU sa mga detatsment ug patrol base ugaling adunay mahitabong panagsangka tali sa militar ug mga yunit sa BHB.

Laraw sa baga nga presensya sa kaaway ang pukanon ang baseng masa, liyukan ug pulbuson ang mga yunit sa hukbong bayan ug tibuok rebolusyonaryong kalihukan sa langkub sa natarang gerilya.

Gamit sa AFP ug PNP ang mga misurender nga traydor sa masa ug rebolusyon. Nagsilbi silang mga giya aron utingkayon ang lugar, magsabwag og kahadlok ug pugos nga magpasurender sa mga sibilyan. Kuyog sila sa mga sundalo sa pagpaniktik, pagkuha og litrato sa mga balay ug indibidwal nga gidudahan nilang mga suporter sa BHB sa takuban sa mga sensus. Samtang nag-alirong ang mga ahente ug sundalo sa mga komunidad, adunay mga sundalong nakadeploy sa taas ug estratehikong tereyn. Nagsilbi silang blocking force sa mga lutsanan sa tunga ug dalan padulong sa kasikbit nga baryo.

Pagpalig-on sa baseng masa

Taliwala niini, subling gitukod ang mga hingpit nga organisasyong masa sa Marcia (di tunay na ngalan), usa sa mga baryong langkub sa operasyong militar. Mayorya sa mga residente dinhi naggikan sa batakang hut-ong. Mayorya kanila mga saop sa agalong yutaan nga wala nanimuyo sa barangay.

Lisud ang kinabuhi sa mga mag-uuma sa Marcia. Biktima sila sa pyudal ug semipyudal nga pagpahimulos. Tersyuhan ang bahinay sa ilang produkto. Sa suhulan, ₱300 ang inadlaw ug ₱500 usab sa pakyaw nga sistema sa trabaho. Mas tataw dinhi ang pakyaw nga pamaagi sa pagtrabaho kaysa inadlawan. Aron madugangan ang kita, nag-alima og mga mananap nga pangbaligya ang mga mag-uuma.

Duul sa baryo ang mga detatsment sa CAFGU ug patrol base sa AFP. Sa miaging mga tuig, nakasinati og grabeng militarisasyon ang baryo kung asa linuog ang mga abusong militar ug krimen sa gubat sa mga sundalo.

Atubangan niini, hugot nga nagkahiusa ang mga residente sa Marcia aron patigbabawan ang giatubang nilang problema sa ekonomiya, pulitika, kultura ug militar. Gatusan ka pamilya, nga adunay kapin 2,000 ka indibidwal, ang mipailalum sa mga balangay sa Pambansang Katipunan ng mga Magbubukid (PKM), Makibaka ug Kabataang Makabayan (KM). Halos usa ka platun sa milisyang bayan ang napalihok sa depensa, mga tim sa yunit pandepensa sa baryo sa kada sityo ug adunay sanga sa Partido sa lokalidad nga nangulo sa baryo.

Pagtukod sa balangay

Gilunsad ning bag-o ang asembleya aron sublin tukuron ang balangay sa PKM sa baryo. Giablihan ang aktibidad sa oryentasyon sa seguridad. Gidayeg sa kumander sa hukbo ang kaisog sa masa nga nagduso nga ipadayon ang pulong masa bisan og tulo ka kilometro lamang gikan sa kanilang pwesto ang nag-operasyong militar.

Sa pulong masa, sistematiko nilang gihisgutan, sa pagpanguna sa instruktor sa pulitika sa hukbo, ang giandam nga mga dokumento sa pagsumada sa kalihukan sa lugar, kasaysayan, bag-ong resulta sa katilingbanong pakisusi, suhetibong sitwasyon, istruktura ug tahas, usa ka tuig nga Programa ug mga palisiya sa rebolusyonaryong organisasyong masa sa baryo. Gihatagad nila og duut ang rebolusyonaryong kasaysayan sa baryo. Lagsik ang diskusyon sa pagtibangay sa tibuok kalihukan gikan pa dekada 1960 sa panahon sa KM, dekada 1970 sa panahon sa balaod militar ni Marcos Sr, ug pag-abot ug paglihok sa hukbong bayan sa baryo hangtud sa kasamtangan.

Ayha ang aktibidad, gihimo ang serye sa mga pulong-konsultasyon sa Partido, yunit sa BHB ug responsableng lider masa sa baryo. Naghimo og kumprehensibong plano subay sa kinatibuk-ang plano sa komite sa nataran ug seksyon komite ug sa aktwal nga lihok sa kaaway. Sulod sa usa ka semana, nataho ang mga gimbuhaton ug rekisitos sa pagpatuman sa plano sama sa pagsumada, pagpanukiduki ug pahimo og plano. Gihimo ang pasiunang pulong aron hisgutan ang mga borador ug tun-an ang giandam nga mga dokumento. Gihimong kampanya ang paghiusa sa tibuok organisadong masa sa maong mga dokumento dungan ang kampanya sa pagtuon sa Rebolusyon. Gihimo usab nga kampanya ang pagbalik-tuon sa rebolusyonaryong giya sa repormang agraryo, nga usa sa batakang dokumento sa PKP.

Ikaduhang bahin: Kalihukang pagtul-id ug ang pagtukod sa organisasyong masa.