Determinado ang Partido, Bagong Hukbong Bayan at buong rebolusyonaryong kilusan sa Negros na patatagin ang baseng masa sa saklaw nito. Ibinibigay nila ang buong lakas, katapangan at walang pag-aalinlangan sa pagpapatupad ng gawaing masa sa gabay ng kilusang pagwawasto sa harap ng walang humpay na operasyong militar sa larangang gerilya.

Sa halos buong buwan ng Agosto, pinatindi at pinalawak ng AFP at SAF-PNP ang operasyong militar sa kabundukan ng isang larangan sa Negros. Ipinakat dito ang mahigit 600-700 pwersa sa 32 kolum (9-12 na elemento) ng pasistang tropa mula sa limang batalyon ng militar at isang batalyon ng pulis. Nakaantabay naman ang mga elemento ng CAFGU sa mga detatsment at patrol base sakaling may mangyaring sagupaan sa pagitan ng militar at mga yunit ng BHB.

Layunin ng makapal na presensya ng kaaway ang tugisin ang baseng masa, kubkubin at durugin ang mga yunit ng hukbong bayan at buong rebolusyonaryong kilusan sa saklaw ng larangang gerilya.

Gamit ng AFP at PNP ang mga sumukong traydor sa masa at rebolusyon. Nagsilbi silang mga giya para halughugin ang lugar, maghasik ng takot at sapilitang magpasuko sa mga sibilyan. Sumasama sila sa mga sundalo sa paniniktik, pagkuha ng litrato sa mga bahay at indibidwal na pinagdududahan nilang mga tagasuporta ng BHB sa tabing ng mga kunwa’y sensus. Habang gumagalugad ang mga ahente at sundalo sa mga komunidad, may mga sundalong nakapakat sa matataas at estratehikong tereyn. Nagsisilbi silang blocking force sa mga lagusan sa gitna at daanan patungo sa katabing baryo.

Pagpapatatag sa baseng masa

Sa gitna nito, muling itinayo ang mga ganap na samahang masa sa Marcia, isa sa mga baryong saklaw ng pangkalahatang operasyong militar. Mayorya sa mga residente dito ay mula sa batayang uri. Kalakhan sa kanila ay tenante ng panginoong maylupa na hindi nakatira sa barangay.

Mahirap ang buhay ng mga magsasaka sa Marcia. Biktima sila ng pyudal at malapyudal na pagsasamantala. Tersyuhan ang partehan sa kanilang produkto. Sa mga sahuran, ₱300 ang arawan at ₱500 naman sa pakyaw na sistema ng trabaho. Mas tampok dito ang pakyaw na pamamaraan sa pagtrabaho kaysa arawan. Para madagdagan ang kita, nag-aalaga ng mga hayop pambenta ang mga magsaasaka.

Malapit sa baryo ang mga detatsment ng CAFGU at patrol base ng AFP. Sa nakaraang mga taon, dumanas ng matinding militarisasyon ang baryo kung saan kahindik-hindik ang mga abusong militar at krimen sa digma ng mga sundalo.

Sa harap nito, mahigpit na nagkakaisa ang mga residente ng Marcia para lagpasan ang hinaharap nilang problema at suliranin sa ekonomya, pulitika, kultura at militar. Daan-daang pamilya, na may higit 2,000 indibidwal, ang pumapaloob sa mga balangay ng Pambansang Katipunan ng mga Magbubukid (PKM), Makibaka at Kabataang Makabayan (KM). Halos isang platun ng milisyang bayan ang napakilos sa depensa, mga tim ng yunit pandepensa sa baryo sa kada sityo at may sangay ng Partido sa lokalidad na namumuno sa baryo.

Pagtatayo ng balangay

Idinaos kamakailan ang asembleya para muling itayo ang balangay ng PKM sa baryo. Binuksan ang aktibidad sa oryentasyon sa seguridad. Pinuri ng kumander ng hukbo ang katapangan ng masa na nagtulak na ituloy ang pulong masa sa kabila nang tatlong kilometro lamang mula sa kanilang pwesto ang nag-ooperasyong militar.

Sa pulong masa, sistematiko nilang tinalakay, sa pangunguna ng instruktor sa pulitika ng hukbo, ang nakahandang mga dokumento ng paglalagom ng pagkilos sa lugar, kasaysayan, huling resulta ng panlipunang pagsisiyasat, suhetibong sitwasyon, istruktura at katungkulan, 1-taong Programa at mga patakaran ng rebolusyonaryong organisasyong masa sa baryo. Nagdiin sila sa rebolusyonaryong kasaysayan ng baryo. Matingkad ang talakayan sa pagtutulungan ng buong kilusan mula pa dekada 1960 sa panahon ng KM, dekada 1970 sa panahon ng batas militar ni Marcos Sr, at pagdating at pagkilos ng hukbong bayan sa baryo hanggang sa kasalukuyan.

Bago ang aktibidad, isinagawa ang serye ng mga pulong-konsultasyon ng Partido, yunit ng BHB at responsableng lider masa sa baryo. Gumawa ng komprehensibong plano batay sa kabuuang plano ng komite sa larangan at seksyon komite at sa aktwal na kilos ng kaaway. Sa loob ng isang linggo, naitala ang mga gawain at rekisitos sa pagpapatupad ng plano gaya ng paglalagom, pagsisiyasat at pabubuo ng plano. Isinagawa ang paunang pulong para talakayin ang mga borador at pag-aralan ang inihandang mga dokumento. Ginawang kampanya ang pagbubuklod sa buong organisadong masa sa mga dokumentong ito kasabay ang kampanya sa pag-aaral ng Rebolusyon. Ginawa ring kampanya ang pagbabalik-aral sa rebolusyonaryong gabay sa repormang agraryo, na isa sa batayang dokumento ng PKP.

Pangalawang bahagi: Kilusang pagwawasto at ang pagtatayo ng samahang masa.