Gitukod ning bag-o sa mga Negrosanon ang GMO-Free Negros Coalition, usa ka asosasyon sa 82 ka indibidwal ug organisasyon gikan sa sektor sa mag-uuma, non-governmental organization, tawong simbahan, estudyante, akademiko, tag-iya sa mga hotel ug restawran ug pribadong sektor aron babagan ug batukan ang planong pagsulod sa mga tanum nga GMO (genetically-modified organism) sa prubinsya.

Ginaduso nilang kinahanglang sundon ang mga ordinansa nga nagabawal sa pagsulod, pagtanum, pagpadaku, pagtesting ug distribusyon sa buhi nga GMO sa isla.

Niadtong 2023, nagpadayag og interes ang San Miguel Corporation nga mamuhunan sa prubinsya alang sa pabrika sa patuka ug proyektong manukan. Aron madayon ang proyekto, nagsumite og sugyot nga ordinansa niadtong Agosto 26 ang lokal nga gubyerno aron tugutan ang pagtanum sa mga korporasyon og GMO nga mais.

Niadtong Setyembre 30, nagsumite og upat ka position paper ang koalisyon sa sangguniang panglalawigan aron hagiton ang sugyot nga ordinansa. Nagprotesta usab ang mga kabatan-onang estudyante gikan sa lain-laing konseho, organisasyon ug publikasyon niadtong Setyembre 18 sa Bacolod City aron ipadayag ang ilang pagsupak.

Nagpadayag usab sa hugot nga pagsupak dinhi ang National Democratic Front-Negros. Matud niini, mas labawng mag-ilaid sa kalisud ang mga mag-uuma kung tugutang mosulod ang GMO sa prubinsya tungod kay mapugos silang magsalig sa mga imported nga binhi sa GMO ug mga input nga kontrolado sa langyawng korporasyon. Peligroso usab sa panglawas ang GMO tungod sa epekto niini sa kalawasan sama sa allergy, antibiotic resistance, cancer ug malungtaron nga pagkadaut sa internal organ sa tawo.